Meclisa Jinan a Partiya Wekhevî û Demokrasiyê ya Gelan (DEM Partî) ya Aydinê, bi beşdarbûna Parlamentera Colemêrgê Oznur Bartin û Alîkara Hevserokê Giştî ya ji Komîsyona Gel û Baweriyan Berpirsyar Yuksel Mutlu li Navenda Çandê ya Elewî Bektaşî û Cemxaneyê ya navçeya Dîdîmê ya Aydinê bi jinên Elewî re civiyan.
Yuksel Mutlu di civînê de axivî û diyar kir ku civaka Elewî li seranserê dîrokê bi cihêkarî û zextan re rû bi rû maye û destnîşan kir ku divê azadiya baweriyê bê mîsogerkirin.
Yuksel Mutlu anî ziman ku Elewîtî bi sedan sal in bi têkoşîn û berxwedanê hebûna xwe diparêze û bal kişand ser berxwedana dîrokî ya jinên Elewî.
Yuksel Mutlu diyar kir ku divê jinên Elewî bibin aktora pêvajoya aştî û demokratîkbûnê û bang li beşên cuda yên civakê kir ku divê bi awayekî azad bawerî û nasnameyên xwe bînin ziman.
Parlamentera DEM Partiyê ya Colemêrgê Oznur Bartin jî bal kişand ser girîngiya hevgirtina jinan a li dijî zext û serweriya mêran. Oznur Bartin anî ziman ku jinên Kurd, Ereb, Tirkmen û Elewî li seranserê dîrokê li dijî komkujî û qirkirinan li ber xwe dane û diyar kir ku ji bo avakirina civaka demokratîk divê her kes berpirsyariyê bigirin ser xwe.
Oznur Bartin destnîşan kir ku avakirina aştiyê ji şerkirinê zehmettir e û diyar kir ku jin dikarin bi parastina nasnameyên xwe têkoşîneke hevpar bimeşînin û got, “Em dikarin aştiyê bînin vî welatî.”
Şandeya DEM Partiyê wê saet di 17.30’an de li Cemxaneya Komeleyên Çanda Elewiyan a Sokeyê bi jinên Elewî re bicivin.
