Hêzên Têkoşîna Dijî Madeyên Hişbirê yên Hêzên Ewlekariya Hundirîn ên kantona Firatê ragihand ku di 4 Mijdarê de ji hêla Nivîsgeha Giliyan a bajarê Sirînê ve agahî ji wan re hatin ku rewşên dizînê û bikaranîna hişbirê çêbûne, hejmarek belavkerên hişbirê girtin.
Hêzên Têkoşîna Dijî Madeyên Hişbirê bi hevkariya Dozgeriya Giştî dewriyeke ji bo lêgerîn û lêpirsînê ava kir, tohmetbar girtin, madeyên hişbirê yên li gel wan desteser kirin, laptopeke hatibû dizîn û pere hatin destserkirin.
Hêzan diyar kir ku ew di serdegirtina belavkirin û bikarhênerên hişbirê ji bo parastina ewlehiya civakê de berdewam in.
Girêdayî mijarê, Hêzên Têkoşîna Dijî Madeyên Hişbirê yên kantona Reqayê ragihand ku di operasyoneke serdegirtinê ku berbanga 9ˊê Mijdarê hate lidarxistin de depoyeke tê de bi hezaran hebên hişbirê hate destserkirin.
Di lêgerînê de, 35 hezar û 882 hebên hişbirê (103 hebên kaptagonê, 35 hezar û 779 hebên derûnî yên curbicur hatin dîtin, hebên krîstal û heşîş) û 905 derziyên hişbirê yên ji bo bikaranînê hazir in, hatin destserkirin.
Li kêlek destserkirinan, çek, cebilxane, alavên bikaranîna hişbirê, pereyên sexte, hejmarek ji alavên elektronîk û telefonên ji bo firotina hişbirê hatin girtin.
Hêzan destnîşan kir ku ev operasyon di çarçoveya serdegirtinên bi armanca têkbirina tûrên qaçaxçîtiyê û hişbirê de pêk tên û got lêpirsîn dewam dikin û wê piştre tohmetbar ji Dozgeriya Giştî re bên rakirin.
