Hakki Goren ku li Nexweşxaneya Lêkolîn û Perwerdeyê ya Bajêr a Edeneyê hate dermankirin, di 15’ê Cotmeha 2025’an de teşhîsa Sekonder Parkinsonizm hate danîn. Di raporê de hate ragihandin ku rewşa Goren cidî ye, bi tena serê xwe nikare pêwîstiyên xwe yên jiyanê bi cih bîne û mayina wî ya li girtîgehê ji aliyê tibî ve ne guncaw e. Di rapora desteya tenduristiyê de ku pisporên Tip a Edlî jî lê amade bûn, hate destnîşankirin ku Goren bêyî alîkariya hinekî din nikare jiyana xwe dewam bike.
Goren 7 sal in li girtîgehê tê ragirtin û cirifîn, zehmetiya meşê û axaftinê, kêmdîtin û bicihneanîna pêwîstiyên xwe yên bingehîn ji pirsgirêkên wî yên tenduristiyê ne. Ji ber ku nexweşiyê lê giran kiriye Goren pêwîstiyên xwe yên xweşuştin, paqijî û xwarinê bi alîkariya girtiyên din ên qoxûşê bi cih tîne. Li gorî raporê Goren bi tena serê xwe nikare kincên xwe li xwe bike û ne di wê astê de ye ku karibe li girtîgehê jiyana xwe dewam bike.
Parêzer û malbata Goren diyar kirin ku ji bo cezayê mayî li malê bi cih bîne ti astengiyeke qanûnî nîne, ev yek di raporên nexweşxaneyê de bi rengekî şênber hatiye destnîşankirin û nerazîbûn nîşanî helwesta dozgeriyê dan ku daxwaza berdanê red kir. Malbatê ragihand ku ev biryar ne hiqûqî ye, lê belê karekî tolhildana siyasî ye.
Şaxê Mêrdînê yê OHD’ê ji bo berdana girtiyê bi nexweşiya giran Hakki Goren li ser medya dîjîtal dest bi kampanyayekê kir. Kampanya bi sernavê #HastaMahpusHakkıGöreneÖzgürlük veguherî toreke mezin a piştevaniyê.
