Di salvegera 11’emîn a êrîşên çeteyên DAÎŞ’ê yên li hemberî Şengalê de, kesên jiyana xwe ji dest dan li gelek bajaran bi xwepêşandan û çalakiyan hatin bîranîn.
MÊRDÎN
Di salvegera 11’emîn a komkujiya ku DAÎŞ’ê di 3’ê Tebaxa 2014’an de li hemberî civaka Êzidî kir, li navçeya Mîdyat a Mêrdînê bi banga Tevgera Jinên Azad (TJA) meşek hat lidarxistin. Bi sedan kesên li qada Newrozê kom bûn, bi pêşengiya jinan pankarta bi nivîsa “Qetilkirina jinên Êzidî sûcê li dijî mirovahiyê ye” meşiyan. Di meşê de pankratên ku komkujiyê şermezar dikin hatin hilgirtin û wêneyên cangoriyan hatin hilgirtin û dirûşmên weke “Jin jiyan azadî”, “Şengal rûmeta me ye” û “Jinên Êzidî rûmeta me ne” hatin berzkirin.
Bi sedan kes beşdarî meşê bûn. Piştî meşê li ser navê TJA’yê Hatîce Encu daxuyaniya çapemeniyê xwend. Hatîce Encu diyar kir ku sûcên li ser civaka Êzidî tên kirin sûcên li dijî mirovahiyê ne û destnîşan kir ku hê jî di salvegera komkujiyê de jin û zarokên winda hene û wiha got ji bo winda bên dîtin soza xwe ya têkoşînê diyar kir û xwest bûyerên li Şengalê qewimîn weke jenosîd bên naskirin û statuya Şengalê bê naskirin
DÊRSIM
Li Dêrsimê li avahiya DEM Partiyê bernameya bîranînê hat lidarxistin. Gelek endamên DEM Partî DBP, TJA’yê û welatî beşdarî bîranînê bûn û pankarta ‘Em komkujiya Êzidiyan û qirkirina jinan ji bîr nakin’ hat vekirin. Di bîranînê de endama TJA’yê Menal Temel axivî diyar kir ku di 3’ê Tebaxa 2014’an trajediyeke mezin hat jiyîn.
Menal Temel bang kir ku 3 ‘yê Tebaxê weke ”Roja Çalakiya Navnetewî ya li Dijî Kuştina Jinan û Qirkirinê” were ragihandin. Hevşaredara Dêrsimê Bîrsen Orhan a ji wezîfeyê hat dûrxistin diyar kir ku komkujî û qirkirina li hemberî jinê hînê dewam dike û got Bîranîn piştî pêşandana vîdeoyê bi dawî bû.
EDENE
Rêxistina DEM Partiyê ya Edeneyê têkildarî komkujiya Êzidiyan li Parka Înonu daxuyanî da çapemeniyê. Di çalakiya ku nûnerên partiyên siyasî û rêxistinên civakî yên sivîl ên li bajêr amade bûn de, daxuyaniya çapemeniyê ji aliyê Hevseroka DEM Partiyê ya Edeneyê Hêlîn Kaya ve hat xwendin. Hêlîn Kaya bal kişand ku yek ji trajediyên herî mezin a sedsala 21 ‘an pêk tê û diyar kir ku jin rastî şîdeta zayendî, kolekirin û êrîşên sîstematîk tên. Hêlîn Kaya ev komkujî weke ‘kuştina herî mezin a sedsala 21’an’ bi nav kir. Hêlîn Kaya bang li civaka navneteweyî kir ku piştgiriyê bide vîna xweparastinê ya gel û berxwedana wan demokratîk a ji Şengalê û Efrînê.
