Bi pêşengiya Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) li gelek bajaran Civînên Civaka Demokratîk hatin lidarxistin. Di civînên li bajarên mîna Gever, Êlih, Sêrt, Agirî, Riha, Şirnex û Colemêrgê hatin kirin de, têkildarî pêvajoyê gel hate agahdarkirin û pêşniyarên çareseriyê hatin kirin.
Di civînan de girîngiya aştiyê, valekirina girtîgehan, baweriya ji bo Rêber Apo û tevgera Kurd û mijara ku dewlet jî divê gavek şênber bavêje, herî zêde hatin nîqaşkirin.
Parlamentera Şirnexê ya DEM Partiyê Newroz Uysal Aslan jî beşdarî civînên li navenda Şirnex Emerkoy, taxa Yafes a Cizîrê û gundê Karox û gundê Banihe ya Hezexê bû.
Newroz Uysal Aslan ev tişt anî ziman: “Îro li cîhanê bi siyaseta ferzkirinê ya yekperest, sîstem nayê meşandin. Banga Aştî û Civaka Demokratîk ji bo tevahî gelan rizgariyek e.”
Di civînan de banga Rêber Apo ya Aştî û Civaka Demokratîk hate xwendin û gel piştgiriya xwe ya ji bo pêvajoya demokratîk û bêşer anî ziman.
