Li Stenbolê li Meydana Şîşhaneyê, li Îzmîrê li ber Navenda Çandê ya Turkan Saylan, li Enqereyê li ber Şaredariya Çankayayê, li Wanê li Kolana Hunerê, li navçeya Qoserê ya Mêrdînê, li navçeya Cizîrê ya Şirnexê, li Rihayê li Novada Parkê û li Dîlokê li Parka Yeşilsuyê daxuyanî hatin dayîn. Di daxuyaniyan de pankartên bi nivîsa “Mafê hêviyê tavilê bê cîhanîn” hatin hildan û dirûşmên “Bijî Serok Apo” û “Bijî berxwedana zindanan” hatin berzkirin.
Li Stenbolê di daxuyaniya ku ji aliyê endama Komeleya Hiqûqnasên ji bo Azadiyê (OHD) Arzu Eylem Kayaoglu ve hat xwendin de wiha hat gotin: “Azadiya birêz Ocalan divê ne tenê wekî mafekî takekesî bê dîtin, di heman demê de divê wekî pêwîstiyek ji bo vekirina riya aştiya civakî û siyaseta demokratîk bê nirxandin.”
Di daxuyaniyê de ev bang hate kirin: “Em bang li Komîsyona Meclisê ya TBMM’ê, hemû partiyên siyasî yên di bin banê TBMM’ê de, mekanîzmayên dadweriyê û bi taybetî Wezareta Dadê û hemû saziyên têkildar dikin ku tavilê biryarên DMME’yê û pêşniyarên Komîteya Dijî Êşkenceyê ya Neteweyên Yekbûyî (NY) bi cîh bînin. Herwisa em bang li gel, raya giştî ya demokratîk û hemû saziyên civaka sivîl dikin ku ji bo civakîkirin û bicîhanîna mafê hêviyê hestiyariyê nîşan bidin û berpirsiyariyê bigirin.”
Hevberdevkê Kongreya Demokratîk a Gelan (HDK) Alî Kenanoglu jî diyar kir ku ji bo pêvajoyek bi tenduristî bi rê ve biçe, divê ji bo Rêber Apo “mafê hêviyê” bê bicîhanîn û ew bê berdan. Kenanoglu wiha domand: “Ev yek pêwîstiya hiqûqa navneteweyî ye jî. Pêwîstî ev e ku şertên xebatê ji bo birêz Ocalan bêne afirandin û mafê hêviyê bê cîhanîn. Ev mijar ne mijareke nîqaşê ye. Ji bo ku pêvajo bi tenduristî bi rê ve biçe, pêwîst e mafê hêviyê bê cîhanîn.”
Li Îzmîrê saziyên hiqûqê û mafên mirovan li ber Navenda Çandê ya Turkan Saylan kom bûn û pankarta “Mafê hêviyê tavilê bê cîhanîn” hat vekirin.
Rêveberê Şaxa OHD’ê ya Îzmîrê Selahattîn Tîmur jî got, “Misogeriya hiqûqî ya vê serdema dîrokî bi bicîhanîna ‘mafê hêviyê’ pêkan e.”
Di çalakiya Hêzên Ked û Demokrasiyê ya Enqereyê de Hevserokê Giştî yê Komeleya Mafên Mirov (ÎHD) Huseyîn Kuçukbalaban axivî û got ku rêgeza “mafê hêviyê” ne tenê ji bo Rêber Apo, lê ji bo bi hezaran girtiyên siyasî jî divê bê cîhanîn. Di daxuyaniya ku bi Kurdî ji aliyê endamê OHD’ê Dogan Şenses û bi Tirkî ji aliyê Rêvebera Şaxa OHD’ê ya Enqereyê Arzu Kurt ve hat xwendin de, wiha hate gotin: “Bicîhanîna ‘mafê hêviyê’ wekî mafekî bingehîn ê mirovî xwedî girîngiyeke mecbûrî ye û di heman demê de ji bo bicîhanîna pêvajoya Aştî û Civaka Demokratîk a ku em îro tê de ne yek ji gavên herî bingehîn e.”
Li Wan, navçeya Qoserê ya Mêrdînê, navçeya Cizîrê ya Şirnexê, Riha û navçeya Şahînbeyê ya Dîlokê jî bi heman daxwazan daxuyanî hatin dayîn. Di daxuyaniyan de bang li TBMM, dadwerî, Wezareta Dadê û hemû saziyan hat kirin ku berpirsiyariyê bigirin ser xwe û “mafê hêviyê” bînin cîh.
