Nobeta çadirê ya ku li dijî Santrala Enerjiyê ya Jeotermal (JES) a ku tê plankirin li sînorên gundê Xwarikê yê ser bi navçeya Gimgim a Mûşê ve were çêkirin hatibû destpêkirin, di roja xwe ya 21’an de jî berdewam kir.
Li ber deriyê qada nobedê ya ku di bin pêşengiya Meclîsa Ciwanan a Platforma Ekolojiyê ya Gimgimê de tê birêvebirin, pankarta “Varto JES’ê naxwaze” hate daliqandin. Li ser çadiran jî pankartên bi nivîsa “Gelê Vartoyê santrala enerjiyê ya jeotermal naxwaze. Dest nede ava min, xaka min” û “Em xweza, bawerî û pêşeroja xwe diparêzin” hatin bişvekirin.
Tevî şert û mercên nebaş ên hewayê jî, serdanên pişgîriyê yên welatiyan di tevahiya rojê de berdewam kirin.
Elî Hasan Akmut ê ku ji gundê Kêçanê tevli nobetê bûye, diyar kir ku ew ji bo parastina xaka xwe di nobedê de ne û got: Heke em xwedî li xaka xwe derneyên, dewlet dê gelê herêmê neçarî koçberiyê bike. Em ê heta dawiyê têkoşîn û berxwedana xwe bidomînin. Ji ber ku li vê herêmê karê çandinî û sewalkariyê tê kirin, em dizanin ku ev proje dê zirarê bide qadên jiyana me.
Serokê Komeleya Ekolojiyê ya Gundê Goşkarê Riza Altun jî bi bîr xist ku wan di borî de nekarîbû rê li ber projeya bendavê ya li gundê xwe bigirin û anî ziman ku par wan ji bo Ava Sipî, ya ku wekî ava baweriyê dibînin, têkoşîn meşandiye.
Altun destnîşan kir ku sermaye berê xwe daye xaka Gimgimê û wiha axivî: Çavên wan têr nabin. Lê belê wekî gel, em ê têkoşîna xwe heta dawiyê bidomînin. Heta ku em sermayeyê ji xaka xwe derpêş nekin, em ê nesekinin.
Di çarçoveya lîsteya nobedê ya ku di navbera 16 gundên ku ji projeyê bandor dibin de hatibû amadekirin, şêniyên gundên Kêçan û Goşkarê nobeda ku dê heta 25’ê Gulanê berdewam bike dewr girtin.
