Taxên wekî Şêxmeqsûd, Eşrefiyê û Benî Zeyd ên Helebê ku piranî Kurd lê dijîn, ji ber dorpêça komên çete yên Hikûmeta Veguhêz a Sûriyeyê ku ji aliyê dewleta Tirkiyeyê ve tên destekkirin, krîzeke mirovî ya giran dijîn. Ji ber ku bêhtirî çar meh in li ser taxan dorpç didomin, ev yek bûye sedema birçîbûn, kêmbûna dermanan û krîzeke cidî ya enerjiyê.
Konseya Tenduristiyê ya taxên Şêxmeqsûd û Eşrefiyê duh bi daxuyaniyekê ragihand ku ji ber dorpêçê û kêmbûna sotemenî, derman û elektrîkê xizmetên tenduristiyê hatiye asta rawestandinê. Hevserokê Meclîsa Tenduristiyê Dr. Osman Şêx Îsa ku ji ANF’ê re li ser rewşa herêmê axivî, bûyeran wekî “êrîşek hovane ku mînakên wê nîne” bi nav kir û diyar kir ku polîtîkayên dorpêçkirinê yên rejîma berê ya Baasê careke din têne bicîhanîn.
Dr. Osman Şêx Îsa, diyar kir ku piştî hilweşîna rejîma Baasê demek kurt bêhnek rehet standine û got ku lê îro rêbazên wekî binçavkirin, zext, lêpirsîn û astengkirina pêdiviyên bingehîn bi awayekî sîstematîk têne bikar anîn da ku îradeya gel bişkînin. Şêx Îsa, destnîşan kir ku ev bûyer ne tesadufî ne, berevajî siyasetek bi zanebûn in.
Şêx Îsa, got ku komên El-Hemzat û El-Emşat ên ku ji hêla dewleta Tirkiyê ve têne destekkirin di 6’ê Cotmehê û 22’yê Kanûnê de êrîşî taxan kirin, lê ev êrîş bi berxwedana gel hatin paşve xistin. Şêx Îsa, diyar kir ku van koman, ji ber ku nekarîn serketinek leşkerî bi dest bixin, piştî têkçûna xwe dorpêçê dijwartir kirin û hewl didin gel teslîm bigirin.
Şêx Îsa, anî ziman ku çar meh in sotemenî, ard, gaz û mazot nayên nav taxan û got ku bi taybetî xetên elektrîkê hatine hedefgirtin û rê li ber çêkirina wan tê girtin. Şêx Îsa got, “Ev rewş rasterast bandorê li nexweşxane, nanpêjxane û dibistanan dike; zarok di sermayê de perwerdehiyê dibînin û ji ber ku sotemeniya jeneratorê hema hema xilas dibe, xizmetên tenduristiyê di xetereyek mezin de ne.”
Şêx Îsa, da xuyakirin ku nebûna dermanan bi taybetî ji bo nexweşên penceşêrê û kronîk gefek mezin çêdike û got ku nexweş ne dikarin ji taxê derkevin û ne jî dikarin li hundur bên dermankirin. Di dawiyê de Şêx Îsa, da zanîn ku rêveberiya Helebê û Hikûmeta Veguhez a Sûriyeyê ji vê siyaseta dorpêçkirin û birçîbûnê berpirsiyar in û ji civaka navneteweyî xwest ku mudaxeleya lezgîn bike.
