Ji bo pîrozbahiyê ku bi dirûşma “Newroza Azadî û Demokrasiyê” hate lidarxistin, şêniyên Hezexê serê sibehê berê xwe dan qadê.
Li gel nûnerên partiyên siyasî û rêxistinên civakî yên sivîl gelek kes beşdarî pîrozbahiyê bûn. Qada pîrozbahiyê bi rengên kesk, sor û zer hate xemilandin.
Beşdaran nerazîbûn nîşanî kiryarên ewlekariyê yên li ketina qadê dan û bi dirûşman ketin hundirê qadê.
Piştî deqeyeke rêzgirtinê ya li ber sirûda “Ey Reqîp” peyama Newrozê ya Rêber Apo hate xwendin.
Parlamentera Wanê ya DEM Partiyê Gulderen Varli di axaftina xwe de bal kişand ser aştiyê û got, “Em ji bo aştiya bi rûmet amade ne.” Gulderen Varli ji bo avêtina gavên şênber bang kir.
Di pîrozbahiyê de “Dayikên Aştiyê” agirê Newrozê dadan û çalakiyê bi muzîk û govendê dewam kir.
Li gel baranê jî pîrozbahî bi coş derbas bû. Girseya gel li ber stranên hunermendên herêmî govend gerand.
