Bi daxwaza azadiya fîzîkî ya Rêber Apo û pêkanîna mafê hêviyê bi sedan şêniyên bajarên Til Temir, Zirgan û Dirbêsiyê yên kantona Cizîrê meşên girseyî li dar xist.
TIL TEMIR
Bi sedan şêniyên bajarên Til Temir û Zirganê bi pêkhateyên wê Ereb, Kurd, Asur û Suryan ji çerxerêya Qendîlê ya têketina Til Temirê dest bi meşê kir. Di meşê de wêneyên Rêber Apo û pankartên bi daxwaza azadiya wî ya fîzîkî hatin vekirin. Bê navber jî dirûşmên bi banga azadiya wî hatin berzkirin.
Meş li stadyuma Şehîd Bilind a naverasta bajar veguherî mîtîngê. Li vir ji rêveberên Kongra Star Sena El Samir bi navê şêniyên Til Temirê axivî û got, azadiya Rêber Apo bingeha çareserkirina pirsgirêkên Rojhilata Navîn e û tecrîdkirina wî ji cîhanê hewldanên aştiyê asteng dikin. Senayê got, azadiya jinan û tevahiya civakê bi azadiya Rêber Apo ve girêdayî ne.
Ji fermandarên Meclisa Parastina Xabûrê Şemas Keverkîs jî axivî û destnîşan kir ku ramanên Rêber Apo zemîna xurt a jiyana hevbeş ava kir û ev li gotinên xwe zêde kir: “Ji ber baweriya me bi fikir û felsefeya Rêbertî me herêmên xwe ji terorê û tevliheviyê parastin. Tecrîda li dijî wî, di heman demê de li dijî projeya aştiyê ye ku bi mîlyonan kes pê bang dikin.”
Di mîtîngê de bi navê şêniyên Zirganê jî hevseroka Meclisa PYD’ê ya Zirganê Salih Simo jî diyar kir ku bi saya ramanên azad ên Rêber Apo gelên herêma Bakur û Rojhilatê Sûriyeyê modeleke demokratîk, jiyana hevbeş, azadiya jinan û edaleta civakê pêş xistin. Salih Semo anî ziman ku berdewama tecrîda li dijî Rêber Apo li dijî vê modelê û nirxên wê yên mirovî ye.
Mîtîng bi berzkirina dirûşman bi dawî bû.
DIRBÊSIYÊ
Bi sedan şêniyên bajar û gundewarê Dirbêsiyê jî bi daxwaza azadiya fîzîkî ya Rêber Apo ji qada Jina Azad ber bi çerxerêya Gardînyayê ve meşiyan. Girse wêneyên Rêber Apo hildan û dirûşmên “Bijî Serok Apo” û “Bê Serok jiyan nabe” berz kirin.
Li çerxerêya Gardînyayê endama Meclisa Kongra Star a bajarê Dirbêsiyê Rexeda Şihada axivî û anî ziman ku doza Rêber Apo bi hemû aliyên xwe qanûnî, siyasî û mirovî ye.
Rexda Şihada di dewama axaftina xwe de got: “Dem dema azadiya fîzîkî ya Rêber Abdullah Ocalan e. Bazar li ser azadiya wî nayê kirin. Bi zextên li ser wî edaleteke rasteqîn pêk nayê, lê bi diyalogan pêk tê.”
Endamê Partiya Yekîtiya Demokratîk li bajarê Dirbêsiyê Siûd Dirbas jî da zanîn ku mafê hêviyê di zagonên naveteweyî de hatiye destnîşankirin û mafê her girtiyekî ye ku wî bi dest bixe, lê dewleta Tirk a dagirker vî mafî nade Rêber Apo.
Dirbas wiha pê de çû: “Îmralî keleha berxwedan û aştiyê e, çavkaniya ramanêm demokratîk e û rêya ber bi civaka demokratîk û jiyana hevbeş ve ye. “
Çalakî bi dirûşmên dilsoziya bi Rêber Apo re bi dawî bû.
