Gustavo Petro anî ziman ku hikumetê hevdîtinên aştiyê yên ku bi komek ji endamên berê yên FARC’ê dimeşand, bi dawî kiriye. Petro ji sala 2023’an û vir ve bi lîderê koma çekdar a bi navê EMBF Calarca re danûstandin dikir.
Lê belê hikumetê ragihand ku ji ber komê danîna çekan red kir û êriş dewam dikir, hevdîtin hatine bidawîkirin.
‘AŞTÎ DIVÊ LI SER HÎMÊN CIDÎ BÊ DANÎN’
Petro dema biryara xwe eşkere kir got, “Aştiyê dixwazim, lê belê aştî divê li ser hîmên cidî bê danîn, ne li ser derewan.” Petro diyar kir ku dewamiya êrişên EMBF’ê û xisara li hawirdorê kir ku pêvajo nemeşe.
MUZAKEREYÊN DIN JÎ TÊK ÇÛN
Heman rojê yek ji rêxistinên qaçaxçitiya narkotîkê ya herî mezin a welêt Clan del Golfo jî eşkere kir ku îhtimala aştiyê ya bi hikumetê re êdî nemaye.
Hevdîtinên beriya niha yên bi tevgera gerîla ya herî kevn ELN re dihate meşandin, piştî êrişa ku zêdeyî sed kes mirin, bê encam mabû.
Hêviya aştiyê ya li Kolombiyayê piştî bûyerên dawî ber bi rewşeke nediyar ve çû.
