Piştî êrîşên çeteyên HTŞ-DAÎŞ û çeteyên girêdayî dewleta Tirk a dagirker ên li ser Rojava, li gelek deverên cîhanê ji bo xwedîlêderketina berxwedana Rojava bertek û çalakî dest pê kirin. Yek ji wan deverên ku ev çalakî domdar bûn jî parzemîna Amerîkaya Latîn bû. Gelên Amerîkaya Latîn li gelek deverên parzemînê ji bo parastina şoreşa Rojava çalakî û bernameyên cuda birêxistin dikin.
Di nîvroya 22’yê Çile de, li paytexta Bogotayê komek pêşeng a ji dehan kesan a ji kolektîfên civakî, tevger û rêxistinên cuda yên cuda li hev civiyan û hin çalakiyên ku dê ji bo piştgiriya şoreşa sedsala 21’emîn a ku bi paradîgmaya Modernîteya Demokratîk tê teşegirtin, bi pêşengiya jinan komûn pêş ketine, bi avahiya civakî û gelêrî ya Konfederalîzma Demokratîk ji cîhanê re bûye îlhamekê, plankirin.
Di civîna li Bogotayê de rewşa êrîşên ku Rojava ji 6’yê Çile û vir ve rû bi rû maye hate nirxandin. Di heman demê de ev rewş di çarçoveya şerê cîhanê yê sêyemîn û guherînên jeopolîtîk ên di hundirê pergala kapîtalîst a cîhanî de hate nirxandin. Di vê pêvajoyê de hate destnîşankirin ku têkoşîna hêzên hegemonîk ên cuda ji bo kontrolkirina rêyên enerjiyê û bazirganiyê yên cîhanî dibe sedema zêdebûna pevçûn û şerên ku gelên cîhanê dijîn. Di nîqaşên hatin kirin de derket holê ku pêwîste deng bi awayekî bihêz ji bo parastina Rojava û bajarê dîrokî yê Kobanê yê niha di bin metirsiyê de ye bê bilindkirin.
Di çarçoveya piştgiriyê de hin çalakî hatin plankirin; ev çalakî dê di 24’ê Çile roja Şemiyê de dest pê bikin û heta dawiya hefteyê bidomin. Rêxistinên cuda hefteyeke çalakiyê ya ku ji xebatên afîşên piştgiriya Rojava, mobîlîzasyonên civakî, protesto û bûyerên çandî pêk tê plan dikin û bi vî awayî beşdarî bangewaziya enternasyonalîst dibin.
Hin kesên beşdarî civînê bûn peyameke bi dîmen şandin ku tê de ev gotin hebûn: “Ji Kolombiyayê heta Kurdistanê, parastina Kobanê, parastina Rojava, parastina Abya Yala; parastina jiyanê ye.”
