Pîrozbahiya Newroza Ciwanan a li Londonê ji aliyê Tevgera Ciwanên Şoreşger ên Brîtanyayê (TCŞ) ve hate organîzekirin û li Navenda Civaka Kurd bi beşdariya bi sedan kesan hate lidar xistin.
Posterên Rêber Apo, Mazlum Dogan û şehîdên Newrozê li qada çalakiyê hatin daliqandin. Pankartek bi nivîsa “Em banga Birêz Abdullah Ocalan Silav dikin. Em civakek demokratîk ava dikin” li salonê hate hilgirtin. Ji ber beşdariya mezin a ciwanan salon bi tevahî tijî bû.
Bername bi deqeyek rêzgirtinê ji bo bîranîna şehîdên şoreşger dest pê kir. Piştre li ser wateya Newrozê sinevîzyoneke hate temaşekirin.
Li ser navê TCŞ’ê Halît Riha axivî û diyar kir ku Newroz sembola berxwedanê ye, got ku azadiya Rêber Apo azadiya her kesî ye û banga aştiyê silav kir.
Hevserokê Meclîsa Gelê Kurd a Londonê Îshak Mîlanî, jî anî ziman ku Kurdan di demên berê de zilm û zordariya giran dîtine, lê ev pêvajo bi berxwedanê hatiye derbaskirin. Mîlanî banga yekîtî û azadiyê kir.
AGIRÊ NEWROZÊ JI HÊLA MALBATÊN ŞEHÎDAN VE HAT VÊXISTIN
Koma Folklorê ya Zarokan û hunermend Berfîn Aktay, Ciwan Serhed û Mervan Şan jî derketin ser dikê . Bi sedan kesên ji Kurdistanê govend gerandin û gelek caran dirûşmên ‘Bijî Serok Apo’, ‘Em Apocî ne’, ‘Şehid namirin’, ‘Biji Berxwedana Rojava û Rojhilat’ û ‘Bê Serok Jiyan nabe’ berzkirin.
Li ber avahiya KCC’ê malbatên şehîdan Newroz agirê vêxistin û strana ‘Çerxa Şoreşê ‘ hate gotin. Çalakiya Newrozê heta saetên derengiya şevê dewam kir.
