Li gundewarê Barman a navçeya Stewrê, ji bo Emel Guneş (Pîroz Mardîn), Fatîh Aydin (Agir Mardin), Nevzat Fîdan (Arat) û Vedat Aydin (Piling Barman) ên ku di demên cûda de şehîd bûne konê sersaxiyê hat danîn.
Konê sersaxiyê ya ku ji hêla malbatan ve hatibû danîn, bi meşek girseyî hat ziyaretkirin. Di meşê de dirûşm hatin berzkirin û sersaxî ji malbatan re xwestin. Li ser têkoşîn û bîranîna kesên ku jiyana xwe ji dest dane axaftin hatin kirin.
Parlamentera DEM Partiyê ya Mêrdînê Bêrîtan Guneş Altin di sersaxiyê de axivî û diyar kir ku kesên ku jiyana xwe ji dest dane bi salan bedelên mezin dane û banga xwedîderketina têkoşîna wan û nirxên ku wan li pey xwe hiştine kir.
LI ARTUKLU Û KERBORANÊ SERSAXÎ
Li taxa Qereşîkê ya navçeya Artukluyê ji bo Sevcan Bulut (Serhildan Serbaz) sersaxî hat danîn. Rêveberên DEM Partiyêyên navçeyê û bi sedan welatî serdana sersaxiyê kirin.Di serdanê de ji bo bîranîna şehîdan deqeyek rêz hat girtin.
Li Mala Cenazeyan a Micir Safa ya li taxa Tepebaşiyê ya Kerboranê ji bo Felek Yîgît (Arjîn Kerboran), Eshan Agirman (Çekdar Serdar) û Hanîfe Cebe (Dîcle) sersaxiyê hat danîn.
Sersaxiya ku saet 8:00’an de hat danîn, bi wêneyên şehîdan û gulan hat xemilandin. Tevî malbatan, gelek welatî beşdarî sersaxiyê bûn. Tê payîn sersaxî wê roja Yekşemê piştî serdana girseyî û merasîma bîranînê bi dawî bibe.
LI BISMILÊ MEWLÛD HAT XWENDIN
Li navçeya Bismilê ya Amedê ji bo kesên ku di dîîrokên cuda û li herêmên cuda de şehîd bûne, li Hola Daweta Firatê ya li taxa Akpinarê sersaxî hat danîn. Sersaxî di roja sêyemên de bi xwendina mewlûdê bi dawî bû.
Tevî Hevserokên Giştî yê DBP’ê Çîgdem Kiliçgun Ûçar û Keskîn Bayindir bi sedan kes beşdarî mewlûdê bûn. Hola ku sersaxî lê hat danîn wêneyên şehîdan, Rêber Apo û pankart hatin daliqandin. Sersaxî piştî xwendina mewlûdê bi dawî bû.
LI SÊRTÊ JI BO FERHAT KAYA BÎRANÎN HAT LIDARXISTIN
Li taxa Bariş a navenda bajarê Sêrtê ji bo şervanê YPG’ê Ferhat Kaya (Dilşad Herekol) ê ku di 10’ê Sibata 2018’an de li Efrînê şehîd bû, merasîma bîranînê hat lidarxistin.
Nûnerên partiyên siyasî, rêxistinên civaka sivîl û gelek kes beşdarî bîranîna ku ji hêla MEBYA-DER’ê ve hat lidarxistin, bûn
Beriya serdanê girseya li hev kom bû, bi dirûşme û pankartên ku wêneyê Kaya li ser bûn heta mala malbatê meşiyan. Piştî meşê ji bo Kaya merasîma bîranînê hat lidarxistin.
