Li navçeya Artûklû ya Mêrdînê, bi şîara ‘Rêbertiya Azad, Civaka Demokratîk’ Newroz hate pîrozkirin. Gelek jin û ciwan beşdarî pîrozbahiyê bûn. Her wiha welatiyên Ereb û Suryanî jî beşdarî Newrozê bûn. Platforma “Newroza Azadiyê Pîroz be”, li pêşiya platformê jî bi zimanê Kurdî, Tirkî, Erebî û Suryanî “Newroz Pîroz be” û li pêşiya vê jî pankarta “Jin jiyan azadî” hate daliqandin.
Jin jî bi pankartên xwe hatin qadê. Pêkhateya Xeta Jinê bi pankarta “Jinên ku bedena xwe kirine xeleka agir, rêya berxwedanê ronî dikin” ketin qadê. Jinên bi cil û bergên xwe yên reng û reng cihê xwe li qadê girtin û bi berzkirina dirûşmeya “Bijî Serok Apo” govend gerandin.
Welatiyan bê navber dirûşmeyên “Bijî Serok Apo”, “Bê Serok Jiyan Nabe” û “Jin, Jiyan, Azadî” berz kirin.
Karkerên Înşaetê jî ji înşaetê derketin û hatin qada Newrozê û kedkarên saziyan jî bi pankartên xwe ketin qadê.
Piştî deqeyek rêzgirtinê, bi hezaran kesan dirûşmeyên “Bijî Serok Apo” û “Şehîd namirin” berz kirin. Di vê navberê de li qadê ala PKK’ê hate vekirin, kesên li qadê jî kêliyên bi coş jiyan kirin. Dayikên Aştiyê di çarçoveya bernameyê de derketin ser dikê û welatî silav kirin û Newroza wan pîroz kirin. Piştre jî hevserokên bajar û navçeyê, hevşaredar û parlamenteran jî welatî silav kirin.
Parlamentera DEM Partiyê Saliha Aydenîz bi çar zimanan welatî silav kirin û ev tişt got: “Mêrdîn ne bajarê gelekî tenê ye, bajareke ku gel hemû bi hev re di nava yekîtiyê de lê dijîn. Feraseta yek mêr, yek ziman li Mêrdînê nayê qebûlkirin. Newroz, Newroza gelan e. Newroza gelan pîroz be. Îsal agirê Newrozê ji bo demokrasî, aştî û azadiyê tê vêxistin.
Ne li Stenbol ne li Mêrdînê, ne li Tirkiye û ne jî li Kurdistanê em qeyim qebûl nakin. Pirsgirêka Kurd çiqasê bilez çareser bibe, wê li Tirkiyeyê ewqasê pêşî li demokrasiyê vebe. Rêberê Gelê Kurd çareseriyê dihilberîne. Ji roja ewilî ve têkoşîna aştî û demokrasiyê dimeşîne. Lewma divê hemû muxalefet li gorî vê nêz bibe û helwesta xwe li gorî vê diyar bike.”
Serokê Giştî yê Partiya Azadî Ayetullah Aşitî jî got, ji bo azadiya gelên bindest têkoşîn pêwîst e. Ayetullah Aşitî anî ziman ku bi navê ol, mirov tên îstismarkirin û got, li dijî vê yekê ew ê Qurana Kerîm esas bigirin û têbikoşin.
Piştre Parlementerê DEM Partiyê yê Rihayê Mîthat Sancar jî bi Erebî dest bi axaftina xwe kir û Newroza gel pîroz kir. Sancar got, “Eger li ser esasê wekheviya gelan, sîstemeke mayînde bê avakirin encex hingê wê aştî were.”
Piştî axaftinan, hunermend Hîvron û Pîroz stran gotin.
