Li Mersînê, Komeleya Çukurova ya bi Malbatên Girtî û Mehkûman re Hevkariyê (Çukurova TUAY-DER), Komeleya Hiqûqnasên Ji bo Azadiyê (OHD) û Partiya Wekhevî û Demokrasiyê ya Gelan (DEM Patî) ji bo balê bikşînin ser binpêkirinên mafên li girtîgehan, li ber avahiya Rêxistina Navçeya Akdenîzê ya DEM Partiyê daxuyaniyeke çapemeniyê lidar xistin. Di daxuyaniyê de ku gelek kes tevlî bûn, bang hate kirin ku êşkence, sepandinên keyfî û tecrîda girankirî bên rawestandin.
‘SEPANDINÊN KEYFÎ BÛNE SÎSTEMATÎK’
Hevseroka TUAY-DER’ê a Çukurovayê Adalet Kuran got ku li girtîgehên Tirkiyeyê êşkence, muameleya xirab, lêgerîna tazî ya bi zorê, derman nekirina girtiyên nexweş û astengkirina azadiya bi şert bi awayekî keyfî bûye sîstematîk.
Kuran anî ziman ku bi taybetî li Girtîgeha Ewlekariya Bilind a Çorluyê û gelek girtîgehên din, lêgerîna tazî ya bi zorê û tundîya fizîkî berdewam dike.
Kuran destnîşan kir ku gihîştina girtiyên nexweş a ji bo dermanan ji ber ku Saziya Tipa Edlî wekî desthilatdariya yekane hatiye destnîşankirin tê astengkirin. Her wiha, mafê berdana bi şert bi rêya Komisyonên Îdare û Çavdêriyê bi hincetên keyfî tê astengkirin. Kuran got ku “ferzkirina poşmaniyê” li dijî rûmeta mirovî ye û daxwaz kir ku ev komisyon bên girtin.
BANGA DAWÎANÎNA TECRÎDÊ
Adalet Kuran diyar kir ku tecrîda girankirî ya li ser Rêber Apo tê sepandin ne tenê binpêkirineke mafên takekesî ye, her wiha ji bo paşeroja demokratîk a Tirkiyeyê û pêvajoya aştiyê jî astengiyeke giran e. Wê got ku divê ev tecrîd bê rakirin.
Dayika Aşitiyê Hediye Erçin jî daxwaz kir ku bi taybetî azadiya Rêber Apo û hemû girtiyên siyasî bê misogerkirin û got: “Ji bo aştiyê divê zindan bên valakirin.
Daxuyanî bi çepik bi dawî bû.
