Serokê Giştî yê Partiya Wekhevî û Demokrasiyê ya Gelan (DEM Partiyê) Tuncer Bakirhan, beşdarî merasîma bibîranîna Hacı Bektaş-i Velî ya li navçeya Hacıbektaş a Nevşehîrê bû. Bakirhan piştî serdana Tûrbeya Haci Bektaş Velî, çû Cemeva Garip Dede û beşdarî belavkirina “lokmayê” ya di çarçoveya bibîranînê de bû.
Bakırhan di mîtînga li qada navçeyê de axivî û got: “Li ber Hûnkar, em di binê wê dara pîroz a ku mirovahiyê ronî dike de ne. Nefesa wî ya me ye, gotina wî riya me ye; nefesa wî nefesa me ye. Em li ser axa Hûnkar hakîkatê digerin.”
‘ELEWÎ LOKOMOTÎFA AŞTIYÊ NE’
Bakirhan destnîşan kir ku Elewî ji Kerbelayê heta îro di her qonaxa têkoşîna demokrasiyê de lokomotîfa aştiyê ne û wiha axivî: “Elewî bi berxwedana xwe hêzê didin demokrasiyê. Wekî birayekî ku nasnameya wî tê înkarkirin, ez baş dizanim înkarkirina baweriyê çi ye. Lê me bi têkoşîna bi hev re ew zincîra tirsê şikand û em gihaştin îro. Ji bo ku hemû gel û bawerî azad û wekhev bin, em ketin rê. Îro li ser canên Elewî lîstikên mezin tên lîstin. Xefkên asîmîlasyonê tên danîn, îradeya wan tê paşguhkirin. Divê ev çalakî bên rawestandin. Zulm û cudakarî didome; çareserkirina van pirsgirêkan êdî nikare bê paşguh kirin. Ji bo dawîanîna polîtîkayên cudakariyê, em ê di her qada jiyanê de mil bi mil bin.”
‘EM Ê NEHÊLIN ELEWÎ KERBELAYÊN NÛ BIJÎN’
Bakirhan bal kişand ser êrîşên li ser Elewiyan li Sûriyê û wiha got: “Birayên me rastî qirkirinan hatin. Yezîdên wê demê, bermahiyên DAÎŞ’ê Elewî qetil kirin. Ez careke din dibêjim, em ê li hemberî vê qirkirinê bêdeng nemînin, Kurdên li Sûriyê jî bêdeng namînin. Em ê nehêlin Elewî Kerbelayên nû bijîn. Wekî duh, îro jî em ê li dijî Yezîdan têbikoşin.”
‘AŞTÎ BI RÛBIRÛBÛNÊ MUMKUN E’
Bakirhan diyar kir ku aştiya rastîn tenê bi rûbirûbûnê mumkun e û wiha domand: “Divê hesabê qirkirinan bê pirsîn, tawanbar bên darizandin. Li ber Hûnkar, şêr û cehlan bi hev re radiwestin. Ev tablo ne mûcîze ye, lê terbiyeyekê û hakîkatekê vedibêje. Ev manifestoya aştiyê ya mezin e ku Hûnkar pêşkêşî me kiriye. Divê her endamê komîsyona li Meclîsê hatî avakirin li Hûnkar binêre û biaxive. Em ê tu carî pêvajoyekê ku Elewiyan nebîne qebûl nekin. Ger maseyek hatibe danîn, lingê wê yê din Elewî û bindest in. Em eşkere dibêjin ku em ê pêvajoyek tenê ji bo Kurdan qebûl nekin. Dîyarbekir jî Hacibektaş jî wê azad û wekhev bin. Divê cihên cemê statûya qanûnî werbigirin, cudakarî bi dawî bibe. Em ê şev û roj bi biryar bi hev re bixebitin. Em ê welatekê ava bikin ku 72 milet bi heman nêrînê tê dîtin.”
