Jinên Wargeha Penaberan a Şehîd Rûstem Cûdî (Mexmûr) bi cil û bergên xwe yên Kurdewarî, bi boneya 8’ê Adarê Roja Jinan a Cîhanê meşekî girseyî li dar xistin. Meşê bi kombûna jinên wargehê û xwendekaran ya li ber avahiya Sazîya Malbatên Şehîdan dest pê kir. Meş hata Parkan 4’ê Nîsanê berdewam kir. Di meşê de dirûşmeyên “Jîn, Jiyan, Azadî”, “Bijî berxwedana jina Kurd”, “Bijî Serok Apo” û “Bê Serok jiyan nabe” hatin berzkirin. Jinan di meşê de al û wêneyê Rêber Apo, alên PAJK’ê û dovîzên ku bi nivîsa “Bi ruhê şoreşa jin, soza bilindkirina têkoşînê didin” û “8’ê Adarê Roja Jinên Kedkar a Cîhanê li we pîroz be” hatin hildan.
Piştî ku meş gihîşt Parkan 4’ê Nîsanê, li wêderê têkildarî girîngiya 8’ê Adarê ji aliyê Mamoste Hêlîn Kara axiftinek hat kirin.
Hêlîn Kara di destpêka axaftinên xwe de roja 8’ê Adarê li tevahî jinên cîhanê bi taybet li jinên Kurd, têkoşêr û kedkar pîroz kir û got: “Bi boneya 8’ê Adarê roja têkoşîna jin ya li hemberî zilm û zordariyê, em destpêkê li mîmarê azadiyê Rêber Apo ku vê rojê bi me dayî naskirin, li hemû jinên têkoşer, ji çiyan heta zindanan û li jinên ku îro li hemû qadên têkoşînê ser piyane û li jinên wargehê pîroz dikin. Bi qasî kûrahiya dîrokê jinan kariye pergala xwe ya civakbûyînê, rêxistinbûyîna civakê avabike û li ser wî bingehî pîvanên azadiya jin bidestbixe. Serweriya ked, edalet û bereketê li ser we kiriye. Bi qasî dîroka desthilatdariyê jin, jiyan û xweza ji rastiya wê hatiye qutkirin û rastiya wê hatiye berovajîkirin. Bê gûman di hemû şoreşên civakî yên ku çêbûne de, jinan ti carî ev yek qebûlnekiriye û her tim bûye xwedî helwest û li beranberî vê bûye xwedî têkoşînên pir mezin, her wiha bedelên mezin jî dane. Heta gelek caran bi zindî hatine bin axkirin, şewitandin û gelek caran ji civakê jî hatine derxistin. 8’ê Adarê îfadeya têkoşîna jin ya li hemberî zilm û zordariyê ye. 8’ê Adarê têkoşîna guhertina jiyanekî nû û pîvanên rast jiyankirinê ne. Li ser vî bingehî em dibêjin wê 8’ê Adarê bibe roja azadiya fîzîkî ya Rêber Apo.”
Piştî daxuyaniyê jinan li ber stiranên gelêrî govend gerandin.
