Bi sedan jin û mêrên ku bi pêşengiya Tevgera Jinên Kurd a Fransayê, li Qada Republique ya paytexta Fransa Parîsê li hev civiyan, li dijî tundiya li ser jinê meşiyan. Çalakvanên ku pankartên bi nivîsên, “Jin ne kole ne”, “Ji tundiya jinê re na”, “Jin pîroz in” û “Dest nede jinê” hilgirtin, bi dirûşmeyên “Jin, Jiyan, Azadî” li kolanan dengê xwe bilind kirin.
Piştî meşê ji aliyê Berdevka TJK-F’ê ve axaftinek hate kirin. Berdevk diyar kir ku tundiya li ser jinan û zarokan, li seranserê cîhanê yek ji binpêkirinên mafên mirovan ên bingehîn e û got, “Ev pirsgirêk ne tenê trajediyeke kesî ye, pirsgirêkekî sîstematîk e. Têkoşîna me, sedem û bingeha hebûna jinan e.”
Berdevk destnîşan kir ku zextên şer, newekheviyên aborî û pergala baviksalarî, jinan dike armanc û bilêv kir ku bi taybet di krîzên Rojhilata Navîn de hemû bar dimîn li ser milê jinan.
Meş bi dirûşmeya “Jin, Jiyan, Azadî” û tilîliyan bi dawî bû.
