Şêniyên Qamişloyê û gundewarên wê bi heyecan berê xwe daye qada Newrozê ya li Stadyuma Şehîdên 12`ê Adarê.
Di pîrozbahiyê de dê agirê Newrozê were dadan û endamê Desteya Rêveber a Partiya Yektiya Demokratîk (PYD) Aldar Xelîl û bi navê Meclisa Malbatên Şehîdan Şemsîxan Gulo baxivin.
Her wiha Koma Şehîd Hîva, hunermend Daniş Botan, Koma Botan, hunermend Newroz Efrîn, Koma Şehîd Welat, hunermend Sefqan Orkêş, Koma Şehîd Sakîne Cansiz û hunermend Raman Darî derkevin ser dikê.
TIRBESPIYÊ
Xelkê bajarê Tirbespiyê û gundên herêmên Cereh, Aliyan û Sinceq berê xwe da qada Newrozê ya li gundê Derîcîk ê Tirpespiyê.
Qada Newrozê bi wêneyên şehîdan, alên Yekîneyên Parastina Gel (YPG), Yekîneyên Parastina Jin (YPJ) û Meclisa Malbatên Şehîdan û Tevgera Civaka Demokratîk (TEV-DEM) hatiye xemilandin.
Di pîrozbahiya Newrozê de dê hevserokê Partiya Yekitiya Demokratîk (PYD) Xerîb Hiso û Rêveberiya Meclisa Malbatên Şehîdan Selma Xelîl baxivin. Her wiha Koma Şehîd Xebat, Koma Şehîd Rêwan, Koma Şehîd Sabrî, Koma Raman û hunermend Alan Rêbwar û hunermend Hojîn Herîs derkevin ser dikê.
AMÛDÊ
Li bajarê Amûdê jî şêniyên bajar û gundewarên wê berê xwe daye qada Newrozê ya li gundê Çaxir Bazar. Komîteya amedakar ji bo ku gel bikare beşdarî Newrozê bibe, 15 erebe eyar kiribûn.
Di bernameya Newrozê ya Amûdê de dê agirê Newrozê ji aliyê malbatên şehîdan ve were dadan. Axaftin werin kirin û piştre Koma Agirî, Koma Serdem, Koma Şehîd Delîla, Koma Şehîd Mizgîn, hunermend Sîpan Agirî, hunermend Hemûde û hunermend Bilind hunerên xwe pêşkêş bikin.
Di pîrozbahiyan hemûyan de wê peyama Rêber Apo bê xwendin.
