Li Şengalê bi hezaran kes ji pêkhateyên Êzidî, Ereb û Kurdên Şîe bi armanca şermezarkirina komploya navnetewî ya dijî Rêber Apo, daxwazkirina azadiya Rêber Apo û silavkirina peyamên Rêber Apo bi girseyî meşiyan. Di meşê de al û wêneyên Rêber Apo hatin hildan. Di meşê de bêyî navber dirûşmeyên “Bê Serok jiyan nabe” û “Bijî Serok Apo” hatin berzkirin.
Meş ji Çerxerêya Yermûk dest pê kir û heta Mekteba Zarîfe Osê (Mekteba Sor) berdewam kir. Li vir li ser navê Saziya Malbatên Şehîdan a Şengalê, TAJÊ, Yekîtiya Ciwanên Êzidxanê û Rêveberiya Xweser a Şengalê peyam hatin dayîn.
Li ser nave Saziya Malbatên Şehîdan dayika Şehîd Dijwar Feqîr, Xoxê axivî û got: “Em weke civaka Êzidî minetdarên Rêber Apo û Gerîlayên Azadiya Kurdistanê ne. Em 3’yê Tebaxê ji bîr nakin. Qenciya Rêbertî jî ji bîr nakin. Meşa me meşa azadî û hebûnê ye. Em azadiya Serokê xwe dixwazin. Heya em hene, em ê li pey vî fikrî bin. Zarokên me jî di oxira vê rastiyê de şehîd bûn. Ev fikir dibêje, li berxwe bidin û parastina mafê xwe bikin. 74 ferman hate serê me, le me nekarî leşkerek xwe jî çêbikin û pêşî li fermanan bigirin. Bi rehma xwedê û vî fikrî me pêşiya fermanan girt. Em ê timî li pey vî fikrî bin. Weke malbatên şehîdan em ê timî li ser xeta şehîdên xwe û Rêbertiya xwe bin.”
Berdevka TAJÊ Riham Hico jî axivî û wiha got: “26 sal li ser komployê re derbasbû, derbasê sala 27’emîn dibe. Ev komploya navnetewî ya di şexsê Rêber Apo de, li ser civaka Rojhilata Navîn bû. Li ser tevahî çand, bawerî û netewên Rojhilata Navîn bû. Di şexsê Rêber Apo de li dijî civaka Êzidî û Ereb bû. Eger em îro weke civaka Êzidî daketine qadan, ji bo xwe daketine qadan. Em dibêjin, ‘Azadiya Serok azadiya me ye.’ Birastî jî heta Serokatî azad nebe, em nikarin bêjin em azad in. Em bi fikrê wî xwe rêxistin dikin, têkoşîn dikin. Ji saya vî fikrî bûne xwedî hêz û cesaret. Me di 3’yê Tebaxê de dît, heya wê demê me pişta xwe dabe kê xencerê li me xistine. Di roja reş a fermanê de kê me xilas kir, tenê fikir û felsefeya Rêber Apo û şagirtên wî em xilas kirin. Îro em ne ji bo ti kesî, ji bo xwe li virin. Em ê têkoşîna xwe ya bi dirûşmeya, ‘Ji Rêber Apo re azadî, ji Şengalê re Xweserî’ heya dawiyê bimeşînin. Heta em Rêbertî azad nekin, em ê nekarin Xweseriya Şengalê mîsoger bikin.”
Li ser navê Yekîtiya Ciwanên Êzidxanê Hemo Şengalî jî da zanîn ew ê di sala 27’an a komployê de bi Rêbertiya xwe re azad bijîn û got: ‘Rêbertî nasname da me û ji bo tevahî gelan nasname çêkir. Ne saziyên navnetewî yên Ewropa ne jî saziyên ji xwere dibêjin, em mafê mirovan diparêzin, xwedî li vê civaka me derneket. Lê Derwêş û Edûlêyên çiyayên azad hatin em xilas kirin.”
Herî dawî Hevserokê MXDŞ’ê Nayîf Şemo bi navê hemû girseya gel û pêkhateyan daxwaza azadiya Rêber Apo li Iraqê û hemû saziyên navnetewî û mafê mirovan kir.
Daxuyanî bi dirûşmeyên “Bê Serok jiyan nabe” û “Bijî Serok Apo” bi dawî bû.
