Ferhat Onkol ê ku li Girtîgeha Ewlekariya Bilind a Ereglî ya Konyayê girtî ye, di 15’ê Kanûnê de bi rêya telefonê bi malbata xwe re axivî û diyar kir ku kartên nasnameyê yên ku berê li ser wan “Rêxistina terorîst a çepgir” hebû, bi Pêvajoya Aştî û Civaka Demokratîk re hatine guhertin û li ser nasnameyan “Îtirafkarê rêxistina terorîst a çepgir” hatiye nivîsandin.
Onkol anî ziman ku her çiqasî rêveberiya girtîgehê berê hilgirtina kartên nasnameyê tenê di çûna nexweşxaneyê û hevdîtina vekirî de bi sînordar kiribû jî, niha di çûna nexweşxaneyê, hevdîtin, wergirtina pakêtan, derketina hewşê û dema ji koguşê derdikevin li ser xwe bigerînin tê ferzkirin.
Ferhat Onkol diyar kir ku girtiyên ku hilgirtina nasnameyan qebûl nakin bi cezayên dîsîplînî yên wekî qedexekirina ragihandinê, hevdîtin, name û çalakiyên civakî li wan tên birîn. Onkol anî ziman ku êdî di wergirtina pakêtan jî divê nasnameyê li ser xwe bigerînin û yên li dijî vê derdikevin derbarêm wan de lêpirsîna dîsîplînî tê vekirin.
Girtiyên siyasî ragihandin ku ew ê vê pêkanînê protesto bikin û daxuyandin ku heta ev ferzkirin bi dawî bibe ew ê dernekevin hevdîtin û telefonê. Girtiyan gotin, “Wekî girtiyên siyasî, em bang li parêzer, nûner û gelê xwe yê hestyar dikin ku bertekê nîşanî vê pêkanînê bidin.”
Parêzerên Komeleya Hiqûqnasên Ji Bo Azadiyê (OHD) jdiyar kirin ku pêkanînek bi vî rengî li Girtîgeha Şakranê ya Îzmîrê jî tê ferzkirin.
