Saziya Çavdêriyê ya Mafên Mirovan a Sûriyeyê (SOHR), ragihand ku li herêmên cuda yên Sûriyeyê di encama bûyerên tundî û teqîna mayînê de 2 jê zarok bi giştî 7 kesan jiyana xwe ji dest dane.
SOHR’ê, diyar kir ku li bajarê Maret Mesrîn ê girêdayî Idlîbê de, di encama teqîna mayînek de ku bermahiya şer e, kesek mir. Her wiha hat ragihandin ku li heman herêmê li Kampa Dêr Hesan endamekî Hêzên Ewlekariya Giştî ku girêdayî rêveberiya Şamê ye li mala xwe ji aliyê çekdarên nenas ve hate kuştin.
Li gundên girêdayî Humusê jî bûyerên tundiyê zêde dibin. Li gundê Diyabiyê yek ji rêveberên dibistanê di encama êrîşeke çekdarî de hat kuştin. Li gundê Muxtariyê jî hêzên girêdayî hikûmeta Şamê jî ciwanek qetil kirin.
Li Lazqiyê jî tundiya nava malbatê bû sedem ku windahiya can çêbibe. Li gundê Cenata mêrek hevser û kurê xwe qetil kir û avêt bîrekê.
Li bajarokê Yesûiyê ya girêdayî El Bûkemal a Dêrazorê jî, di encama teqîna mayînek ku bermahiya şer e zarokek jiyana xwe ji dest da.
