Polîsên Swîsre roja pêncşemê daxuyanî dan û ragihandin ku di bûyerê de gelek kesan jiyana xwe ji dest dan û gelek kes birîndar bûne.
Şewat li gorî saeta herêmî di derdora 1.30’an de li bara “Le Constellation” ku piranî turîst lê hene, qewimî.
Dema ku pîrozbahiyên sersalê dewam dikirin, şewat derket. Li gorî daneyên ewilî nêzî 40 kesan jiyana xwe ji dest dan, zêdeyî 100 kes jî birîndar bûne. Hat diyarkirin ku rewşa piranî birîndaran, giran e.
Wezareta Karên Derve ya Îtalî daxuyanî da û piştrast kir ku li gorî agahiyên polîsên Swîsreyê, hejmara miriyan nêzî 40 kesan e.
Hat ragihandin ku mudaxileya li şewatê hîna didome.
Rayedaran destnîşan kirin ku bûyer ne ji ber êrîş yan jî sabotajekê qewimî ye.
Lê belê têkildarî sedemên derketina şewatê, agahiyên berfireh nehatin dayîn. Hin saziyên medyaya herêmî îdîa kirin ku dibe madeyên pîroteknîk hatibin bikaranîn.
Tê payîn ku sedemê teqez ê şewatê, dê piştî lêkolînên teknîkê zelal bibe.
