13’emîn Festîvala Jinan a Sakîne Cansiz, ku ji aliyê Yekîtiya Jinên Kurd a Swîsreyê (YJK-S) ve tê organîzekirin û ji aliyê zêdetirî 20 rêxistin û înîsiyatîfên jinan ve tê piştgirîkirin, dê di 28’ê Hezîranê de li Zurichê bi dirûşmeya “Niha Dem Dema Jinan e” were lidarxistin.
Berdevka Demê ya YJK-S Selma Surer, diyar kir ku amadekariyên festîvalê bi mehan e didomin û ne tenê jinên Kurd, di heman demê de gelek saziyên ku bi Tevgera Jinên Kurd re di nava hevgirtinê de ne jî dê beşdar bibin.
Selma Surer, destnîşan kir ku li seranserê Swîsreyê xebat têne meşandin û got, “Bi baweriya bi nirx û pêşengên xwe em vê têkoşîn mezin dikin û didomînin. Bi vê wesîleyê em ê di 28’ê Hezîranê de di saet 11:00’an de li qada festîvalê ya Kasernenarealê ya li Swîsreyê bên cem hev. Meclîs û komunên me li her deverê xebatên festîvalê dimeşînin. Ji bo vexwendina gel, mal bi mal belavok tên belavkirin. Ji bo hevrêyên ku dê ji kantonên dûr werin jî otobûs hatine amadekirin.”
Selma Surer, diyar kir ku hemû amadekariyên li qada festîvalê temam bûne, di nav de bernameyên sehneyê, standên xwarin û agahdariyê û qadên zarokan. Wekî din, îsal cara yekem dê konek taybetî were danîn da ku jiyan û têkoşîna Sakîne Cansız were nîşandan.
Hevseroka CDK-S Dîlan Çetinkaya, jî diyar kir ku armanca festîvalê ew e ku çalakiyekê çêbikin ku jiyana Sakîne Cansiz û têgihîştina wê ya li ser pêşengiya jinan di têkoşînê de nîşan bide. Dîlan Çetînkaya, got ku armanca wan ew e ku jinên ji çar aliyên Swîsreyê di vê festîvalê de bînin cem hev.
BERNAMEYA ÇANDÎ
Dîlan Çetînkaya, anî ziman ku bernameya festîvalê pir bihêz û dewlemend e û got ku ji bo jinan û zarokan amadekariyên taybet hatine kirin. Dîlan Çetînkaya, da zanîn ku ji çar parçeyên Kurdistanê hunermend dê derkevin ser dikê û got ku di çalakiyên zarokan de Zarok Ma jî dê amade be. Dîlan Çetînkaya hemû gel, ciwan û malbatan bi zarokên wan re vexwend festîvalê.
Dîlan Çetînkaya, diyar kir ku festîval dê 28’ê Hezîranê roja Yekşemê saet 11:00’an de li qada Kaserneareal a bajarê Zurich bê lidarxistin.
Di bernameyê de hunermend Ayfer Duzdaş, Nûbûn, Naze Azizi, Eylul Nazliler, Berfîn Demîr, Nûarîn, Koma Stranan a Jinan (Hunera Mizgîn Swîsre), koma folklorê ya Swîsre, koma reqsên herêmî, Koma Erbane, çadira Dengbêjan û Zarok Ma derdikevin ser dikê.
