Komîteya Malbatên Şehîdan a Wargeha Penaberan ya Şehîd Rustem Cûdî (Mexmûr) Şehîd Seyîd Evran, Denîz Bulbun û Aslan Qamişlo ku di dem û cihên cûda de gihiştibûn şahadetê bibîranîn. Bîranîn li Komîteya Malbatên Şehîdan a wargehê bi tevlîbûna gel û bi deqeyek rêzgirtinê destpêkir.
Piştî rêzgirtinê li ser têkoşîn û jiyana her sê şehîdan, Endamê Komîteya Malbatên Şehîdan Hisên Kara axivî û got: “Şehîd wateya jiyana me ne. Em bi saya wan hatine van rojan. Şehîd Seyîd Evran fîlozofek bû. Keda wî tu caran nayê ji bîrkirin. Şehîd Seyîd di ragihandina azad de bi salan têkoşîn da meşandin û bi kamera û pênusa xwe êş û têkoşîna gelê Kurd ji raya giştî re ragihand. Kedekî mezin ya Şehîd Seyîd li wargehê hebû. Her wiha Şehîd Aslan jî bi heman armancê têkoşînek mezin da meşandin. Heval Aslan hertim ji bo rizgariya gelê Kurd kar dida meşandin û di pêvajoya têkbirina DAIŞ’ê de jî kedek mezin da. Hertim pirsa zarok û kalên wargehê dikir. Hertim êşa me parvedikir û xwedî kesayetek şoreşger bû. Her wiha Şehîd Deniz jî ji bo yekitiya Kurdan kedekî mezin da. Di şert û mercên herî giran de yekrêzî û yekbûna Kurdan diparast. Lê mixabin bi destê xiyanetê li Hewlêrê şehîd bû. Em wek gelê Mexmûrê û malbatên şehîdan ti caran şehîdên xwe ji bîr nakin. Wê armanca me û soza me pêkanîna xeyalên şehîdan be. Divê em bi kar û xebatên xwe xwedî li şehîdên xwe derbikevin. Şehîd vê yekî ji me dixwazin.”
Piştî axaftinê sînevîzyona ku li ser jiyan û têkoşîna her sê şehîdan hatibû amadekirin, hate temaşekirin û bîranîn bi diruşmeyên ‘Bijî Serok Apo’ û ‘Şehîd namirin’ bi dawî bû.
