Fermandarê Giştî yê Hêzên Sûriya Demokratîk (QSD) Mazlûm Ebdî di bernameyeke taybet a li ser Ronahî TV’yê de derbarê pêşketinên li Rojava û Sûriyeyê de nirxandin kir. Mazlûm Ebdî behsa hûrgiliyên peymana di navbera QSD û Şamê de kir û got, “Ev pêvajoyek bû. Ev pêvajo di 18’ê Çileyê de dest pê kir. Wê demê peymanek hat çêkirin, lê çarçoveya wê sînordar bû. Em çûn Şamê û bi Şara re civiyan. Îro di navbera me û Şara de bi rêya telefonê axaftin çêbû û me bi hev re peyman îmze kir. Armanca me ya sereke bi vê peymanê re ew e ku em agirbestê misoger bikin. Li dijî gelê me gefên mezin ên komkujî hebûn. Me her tiştê ku ji destê me dihat kir da ku pêşî li vê yekê bigirin. Me dît ku hêzên navneteweyî ne di wê rewşê de ne ku pêşî li vê komkujîyê bigirin û me ev peyman ji bo parastina mafên gelê xwe çêkir.”
Ebdî diyar kir ku li gorî peymanê hêzên hikumeta demkî nakevin bajar û gundên Kurdan. Erka parastina van herêman wê ji hêla Hêzên Ewlekariya Hundirîn ve be, wiha got: “Me li hev kir ku hêzeke sînordar û diyar ji Ewlehiya Giştî derbasî çargoşeya ewlehiyê ya Qamişlo û Hesekê bibin, tenê erkên wan îdarî bin, da ku proseya entegrasyonê bi Hêzên Ewlekariya Hundirîn re bişopînin.”
Mazlûm Ebdî Ebdî anî ziman ku peymanê ji tevahî aliyên îdarî, leşkerî, ewlehî û siyasî ve taybetmendiya herêmên Kurdan xurt kir. Hêzên leşkerî derbasî tu gund û bajarê Kurdan nabin. Birêvebirina van herêman dê ji hêla xelk û karmendên an ên Cizîrê û Kobanê be. Wê hêzên QSDˊê jî xwe li gorî tûgayan li van her du herêman xwe bi rêxistin bike.
RAKIRINA DORPÊÇA SER KOBANÊ
Ebdî da zanîn ku wê dorpêça li ser Kobanê rabe. Di 2ˊyê Sibatê de peyman dikeve pratîkê, hêzên QSDˊê û yên hikumeta demkî ji eniyên şer ên Cizîr û Kobanê vedikişin. Ev lihevkirin piştre herêmên Efrîn, Serêkaniyê jî digirin nava xwe, ji ber ku herêmên Kurdî ne.
Girêdayî vê mijarê, Ebdî ragihand ku tevahî karmendên saziyên girêdayî Rêveberiya Xweser wê entegreyî saziyên girêdayî hikumeta demkî bin û erkên xwe dewam bikin. Têkildarî garantiyên navneteweyî jî, serokê Amerîkayê bi serokê Sûriyeyê re axivî û piştgirî da peymanê. Serokê Fransayê jî got ew ê garantorê siyasî ya peymanê be.
Li ser cih û berpirsiyariya wî piştî peymanê, Mazlûm Ebdî got: “Ez ê di nava gelê xwe de li ser pêşxistina yekitiya Kurdî bixebitin. Min tevahî pêşniyarên girêdayî siberoja xwe red kirin, min mayîna di nav gel de û karkirina li ser yekrêziya Kurdî tercîh kir.”
Ebdî di berdewamê de anî ziman ku: “Em dizanin ku piranî gelê me ji vê peymanê nerazî ye. Lê di vê qonaxê de ev bijarteya guncaw û heyî bû. ji lew re em ji gelê xwe re dibêjin ku bila rihet û bawer bin.”
Der barê vê mijarê de Ebdî daxuyand ku bi hikumetê re li ser vegerandina tevahî dîlgirtiyan li nava malbatên wan li hev kiriye, ji ber ku ev gaveke mirovî ya bingehîn di peymanê de ye û ji bo bidawîkirina zehmetiyên malbatan û xurtkirian baweriyê di nava aliyan de ye.
Ebdî serbilindî û kêfxweşiya xwe bi gelê Kurd û Kurdistanê ya serî hildaye û li kêlek hêzên xwe sekîniye anî ziman û got vê helwesta gel guherînek di raya giştî de çêkir û ji sedema ku hiştiye ev lihevkirin pêk were, ye. Ebdî silavên xwe ji gelê Kurdistanê, hêz û partiyên siyasî yên Kurdî re şandin.
Fermandarê Giştî yê QSDˊê Mazlûm Ebdî di dawiyêd e berxwedana gelê herêmê silav kir û got ew ê heta pêkanîna tevahî mafên rewa têkoşînê dewam bikin û bang li koçberan kir ku vegerin malên xwe, bi taybet xelkê bajarê Hesekê.
