Fermandarê Giştî yê Hêzên Sûriyeya Demokratîk (QSD) Mazlûm Ebdî, ku tevî Hevseroka Daîreya Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed beşdarî Konferansa Ewlehiyê ya Munihê bû, têkildarî hevdîtinan ji Medya Haber TV’yê re axivî.
Mazlûm Ebdî, diyar kir ku di hinek civînan de tevî şandeya Hikûmeta Demkî ya Sûriyeyê beşdar bûne û got: “Madem di navbera me de peymanek heye û em li gorî xalên wê tevdigerin, wê demê me li vir jî tercîh kir ku li ser navê Sûriyeyê tevbigerin. Di hinek civînên girîng de em weke şandeya Sûriyeyê tevlî bûn.”
JI BO ROJAVA QONAXEK NÛ
Ebdî, têkildarî encamên hevdîtinên di konferansê de kiribûn jî wiha got: “Hemû aliyên me pê re hevdîtin kir, gotin ku dê pêvajoya li Sûriyeyê bişopînin. Me jî ji hemû aliyan xwest ku pêvajoyê bişopînin û bibin garantor. Dikarim bibêjim nêzikatiyên erênî hebûn. Ev geşedan, ji bo Rojava îfadeya qonaxeke nû ye. Rêveberiya Rojava – bi taybet rêveberiya leşkerî – cara ewil bi awayekî fermî tê qebûlkirin.”
AGIRBEST Û ENTEGRASYON
Di berdewama axaftina xwe de Ebdî, îşaret bi peymana agirbestê ya di 29’ê Çileyê de di navbera Rêveberiya Xweser û hikûmeta Şamê de hatiye îmzekirin û rewşa dawî ya entegrasyonê kir û got: “Her çend hêdî jî be dimeşe. Ji bo me mijara ewil agirbest bû. Di rewşa heyî de di meriyetê de ye. Pirsgirêkên divê bên çareserkirin hene. Lihevkirinek heye lê em li bendê ne bê pratîzekirin.”
HERÊMÊN KURD DÊ XWE BIRÊVE BIBIN
Ebdî, anî ziman ku herêmên Kurd dê ji hêla îdarî ve xwe birêve bibin û got: “Rêveberên xwe dê ew bi xwe hilbijêrin. Yên di nava YPG, YPJ û QSD’ê de cih digirin, zarokên xelkê herêmê ne û dê li herêmên xwe bimînin, herêmên xwe biparêzin û berpirsyartiya leşkerî li xwe bigirin. Yekîneyên ewlehiya hundirîn jî dê bi saziyên navendî koordîneyî be, lê belê ji hêla rêveberên herêmî ve bên birêvebirin. Saziyên ziman, perwerde û çandê jî dê destketiyên xwe yên heta niha biparêzin û fermî bibin.”
