Fermandarê Giştî yê Hêzên Sûriya Demokratîk (QSD) Mazlûm Ebdî li ser hesabê xwe yê Xˊê 2 nivîs parve kirin. Ebdî di nivîsên xwe de salvegera hilweşîna rejîma Baasê li Sûriyeyiyan pîroz kir û hêvî kir ku qonaxa nû ya ji dîroka welat li ser edalet û îstîqrarê be û pabendiya xwe bi peymana 10ˊê Adarê dubare kir.
Di nivîsa yekemîn a li ser Xˊê de Mazlûm Ebdî got, “Berî salekê Sûriye bi hilweşîna rejîmê re derbasî qonaxeke nû bû. Ew qonax werçerxeke girîng bû, em pê serbilind in ku dawî li dehan salên desthilat û parçebûnê anî.
Em vê boneyê li gelê xwe yê Sûriyeyê pîroz dikin ku îradeya Sûriyeyiyan ji bo avakirina siberojeke li ser bingeha edalet, aramî, hevkarî û parastina mafên tevahî pêkhateyan diyar dike.”
Di parvekirina xwe ya duyemîn de jî wiha got, “Qonaxa heyî li ser hemûyan ferz dike ku bi berpirsiyariya neteweyî ya hevpar û diyalogeke berfireh rabin, berjewendiya Sûriyeyiyan di her tiştî re bê girtin.
Em careke din pabendbûna xwe bi peymana 10ˊê Adarê wekî bingeha avakirina Sûriyeya demokratîk, nenavendî, ya li ser bingeha vîna gel, nirxên azadî, edalet û wekheviyê ye, tînin ziman.”
