Meclîsa Jinan a DEM Partiyê, di daxuyaniya xwe ya nivîskî de got, “Pêşnûmeya Pakêta Darazê ya 12’emîn, ku ji raya giştî re hatiye eşkerekirin, ji rêziknameyeke qanûnî wêdetir hewldaneke desthilatdariyê ye ku civakê li gorî têgihîştina xwe ya îdeolojîk ji nû ve teşe bike.”
Di daxuyaniyê de, hat destnîşankirin ku her çend pirsgirêkên bingehîn ên wekî xizanî, bêkarî, kuştina jinan, îstismara zarokan û neheqî li welêt zêde dibin jî, desthilatdarî li şûna çareserkirina van pirsgirêkan, mafên jin, zarok û kesên LGBTÎ+ hedef digire.
Meclîsa Jinan, diyar kir ku hedefgirtina dayîna nefeqeyê di pêşnûmeyê de dê jinan mehkûmî bêewlehiya aborî û hawîrdorek tundûtûj bike. Meclîsa Jinan, destnîşan kir ku nefeqe mafek girîng ji bo jinan e.
Meclîsa Jinan, da zanîn ku rêziknameyên der barê pêvajoyên veguherîna zayendî de ku di pêşnûmeyê de cih digirin, nasnameyên zayendî yên cûda hedef digirin, mafê kesan ê biryardana li ser laşên xwe sînordar dikin û dikarin rê li ber sûcên nefretê vekin.
Meclîsa Jinan a DEM Partiyê, ragihand ku ew ê destûrê nedin ku mafên jin, zarok û kesên LGBTÎ+ ji destê wan bê girtin û ew ê têkoşîna xwe ya ji bo wekhevî, azadî û civakeke demokratîk bidomînin.
