Serokê Koreya Bakur Kim Jong-un, ragihand ku welatê wî dê bernameya xwe ya çekên nukleerî bêtir berfireh bike.
Li gorî nûçeya ajansa KCNA’yê, Kim diyar kir ku hilberîna madeyên nukleerî yên asta leşkerî di pênc salên dawî de ji du qatan zêdetir bûye. Kim, serdana tesîseke nû ya nukleerî kir û diyar kir ku ji ber zêdebûna gefan ew ê hêza nukleerî bêtir xurt bikin.
Pispor, bawer dikin ku tesîsa ku hatiye ziyaret kirin bi îhtîmaleke mezin navenda dewlemendkirina uranyûmê ya nû li Kompleksa Nukleerî ya Yongbyon e.
Koreya Bakur careke din eşkere kir ku ew ji bo danûstandinan bi DYE re vekirî ye, lê şertê ku bi tevahî dev ji çekên nukleerî berde qebûl nake. Rejîma Pyongyangê, çekên nukleerî ji bo ewlehiya rejîma xwe girîng dibîne.
Koreya Bakur, di sala 1993’yan de ji Peymana Pêşîgirtina Belavbûna Çekên Nukleerî vekişiya. Ji wê demê ve, wê şeş ceribandinên nukleerî û gelek ceribandinên fuzeyên balistik pêk aniye.
Welatê ku di bin dorpêçên NY de ye, di sala 2022’yan de statuya xwe ya hêza nukleerî wekî bêveger ragihand.
Koreya Bakur, ku heta niha di sala 2026’an de heşt ceribandinên fuzeyan pêk aniye, armanc dike ku kapasîteya xwe ya nukleerî zêde bike û destê xwe di danûstandinên navneteweyî de xurt bike.
Li gorî pisporan, Pyongyang xwediyê bi dehan serikên nukleerî ye û rejîm vê hêzê wekî parastinek li dijî destwerdana potansiyel a biyanî dibîne.
