Bi şiarê “Bi îsyana xwe berxwedanê, bi berxwedanê jiyana azad û wekhev hûnandine”, gelek jin di çalakiyê de hatin cem hev.
Berdevka Meclîsa Jinan a DEM Partiyê Halîde Turkoglu di çalakiyê de axivî û diyar kir ku meşa ku wan dixwest li dar bixin bi bariyerên polîsan hatiye astengkirin. Turkoglu destnîşan kir ku piştevaniya jinan dê her mezin bibe.
Halîde Turkoglu bal kişand ser daxwaza jinan a ji bo jiyaneke azad û wekhev û wiha got: “Em jin jiyaneke demokratîk dixwazin. Ji ber wê jî em ê li dora Banga Aştî û Civaka Demokratîk a Birêz Ocalan li ber xwe bidin. Çimkî aştî tê wateya wekheviyê.”
Turkoglu diyar kir ku li Rojhilata Navîn jin tevî hemû zextan li ber xwe didin û bal kişand ser têkoşîna jinan a li Rojava. Turkoglu anî ziman ku êrişên li ser jinên li Rojava li dijî hemû jinan e û got ku ew ê felsefeya “Jin, jiyan, azadî” biparêzin.
Parlementera Stenbolê ya DEM Partiyê Kezban Konukçu jî vekişîna îktîdarê ya ji Peymana Stenbolê rexne kir û banga mezinkirina piştevaniya jinan kir. Konukçu got: “Em ê bi piştevaniya jinan li her derê hûnandina berxwedanê bidomînin.”
Parlementer Çîçek Otlu jî wiha axivî: “Niha em di 8’ê Adarê de ne, em ê li kolanan têbikoshin. Ez hemû jinên ku di girtîgehan de li ber xwe didin silav dikim. Her wiha em Fîgen Yuksekdag jî silav dikin. Em ê li ser vê axê teqez wekhevî û azadiyê bi dest bixin.”
Hevseroka Giştî ya Partiya Jinûve Avakirina Sosyalîst (SYKP) Feray Mertoglu got: “Îktîdara AKP-MHP’ê êrişî destkeftiyên jinan dike. Jin hemû barê civakê hildigirin ser milên xwe. Dema ‘sala malbatê’ tê îlankirin, jin tê paşguhkirin. Em ê li dijî van têbikoşin.”
Hevberdevka Partiya Çep a Kesk Dîdem Betûl Goçer jî wiha got: “Em ê dev ji parastina aştiyê bernedin. Êriş ji tundiya dewleta mêrsalar çêdibin. Jin ji aliyê kesên herî nêzî xwe ve tên qetilkirin.”
