Çalakvanên ji bo azadiya fîzîkî ya Rêberê Gelê Kurd Abdullah Ocalan û çareseriya demokratîk a pirsgirêka Kurd dest bi “Meşa Mezin a Azadiyê” kirin, çûn serdana Mehmet Çengel, Mehmet Emîn Akkuş û Mustafa Okçu ên 30 salan di girtîgehê de man.
Parlamentera DEM Partiyê ya Şirnexê Newroz Uysal Aslan çû serdana Mehmet Çengel ê 5 roj berê ji Girtîgeha Ewlehiya Bilind a Wanê hat berdan û li Taxa Karahanê ya li navenda bajêr dimîne. Parlamenter Newroz Uysal têkildarî armanca meşê agahî da û got, “Birêz Abdullah Ocalan gotibû yên ku ji min fêm dikin hevalên girtî ne.”
Newroz Uysal der barê kampanya “Ji Abdullah Ocalan re azadî, ji pirsgirêka Kurd re çareseriya siyasî” agahî da û got, “Ji bo azadiya fîzîkî ya Birêz Ocalan li her derê cîhanê têkoşînek hatiye destpêkirin. Me piştî gelek çalakî û xwepêşandanên cuda dest bi Meşa Azadiyê kir. Ji bo berfirehkirina pêngava ku hatiye destpêkirin çi ji destê me bê em ê bikin. Em ji du aliyan ve ber bi Amarayê ve dimeşin. Em 75 kes in, lê her ku diçe em bi beşdariya gel dimeşin. Em li her cihê ku em derbas dibin armanca meşa xwe vedibêjin. Tenê daxwazek me heye ew jî azadiya birêz Abdullah Ocalan û çareseriya pirsgirêka Kurd e.”
‘JI BO AZADIYÊ ÇI JI DESTÊN ME BÊ DIVÊ EM BIKIN’
Piştre jî girtiyên serbest hatin berdan mafê axaftinê girtin.
Girtiyê 30 salî Mehmet Çengel ku 5 roj berê hat berdan diyar kir ku Rêberê Gelê Kurd Abdullah Ocalan ji bo azadiya gelan her tiştî dike û got, “Pêwîste em birêz Ocalan biparêzin. Ji bo azadiya wî çi ji destê me tê divê em bikin. Di çarçoveya pêngavê de li girtîgehan grevên birçîbûnê yên dorveger berdewam dikin. Em berxwedana wan jî silav dikin. Hûn parlamenter bi tena serê xwe nikarin tiştekî bikin, pêwîste em jî wek gel bi we re bin. Bi girtinan nikarin çavên gel bitirsînin.”
‘AZADÎ PIR NÊZÎK E’
Girtiyê 30 salî Mehmet Okçul ku mehek berê hat berdan jî wiha got: “Li ser Birêz Ocalan tecrîdeke dijmirovahî tê meşandin. Bi hezaran hevalên me di zindanan de ne. Heta ku birêz Ocalan û bi hezaran girtî di zindanan de bin, em nikarin xwe azad bi nav bikin. Îro bi hezaran hevalên me li zindanan di berxwedanê de ne. Divê em li derve dengê girtiyan bidin bihîstin. Ji berxwedanê pê ve tu tişt nikare tecrîdê bişkîne. Divê em her tiştî li ser milê hevalên xwe yên girtîgehê nehêlin. Em bi hêvî ne, azadiya fîzîkî ya Birêz Ocalan nêzîk bûye. Divê em xwe bigihînin azadiyê. Azadî pir nêzîk e, ger em xwe bigihînin em ê bi dest bixin.”
‘EM RÊXISTINEKE TÊKOŞÎNÊ NE’
Girtiyê 30 salî Mehmet Emîn Akkuş ê 6 meh berê hat berdan jî got, “Em rêxistineke têkoşînê ne. Weke rêxistineke têkoşînê em civaka hevrêyan e. Fikr û pîvanên hevpar hene ku dihêle em li vir bi hev re bin. Di vî warî de hevrêtiya we û bi hev re bûn birûmet e. Em hemû armanca meşê dizanin. Ez hestên hevalên xwe parve dikim. Di vê pêvajoyê de, peywira me ya yekem ew e ku çi ji destê me tê em ê bikin. Di meşê de ji we hemûyan re serkeftinê dixwazim.”
Serdan bi sohbet û nêrînên meşvanan bi girtiyên 30 salî re bi dawî bû.
