Meşa jinan a bi pêşengiya Tevgera Jinên Azad (TJA) bi dirûşma “Em bi hêviyê ber bi azadiyê ve dimeşin” di 1’ê Cotmehê de li Amedê destpê kir, di roja 7’emîn de li Enqereyê dewam kir. Nêzî 250 jinên meşvan ji 7 bajaran derbas bûn û xwe gihandin Enqereyê. Jin serê sibehê li Guvenpark a li Kizilay a Enqereyê li hev kom bûn. Jinan xwestin ji vê derê ber bi Meclîsê ve bimeşin, lê belê li bendên polîsan rast hatin.
Ji ber ku destûr ji meşê re nehate dayin, jinan li Guvenparkê daxuyaniyek dan çapemeniyê. Di dema daxuyaniyê de dirûşmên “Azadî, Azadî, Azadiya Rêbertî”, “Mafê hêviyê mafê gelan e”, “Bijî Serok Apo”, “Bijî berxwedana zindanan”, “Bijî têkoşîna jinan” û “Jin, Jiyan, Azadî, azad bike Rêbertî” hatin qîrîn.
Destpêkê Nalîn Gezgor axivî û spasiya wan jinan kir ku li Enqereyê ew pêşwazî kirin. Nalîn Gezgor diyar kir ku weke jinên bi hêvî û azadiyê ji Amedê bi rê ketin ew li paytexta Tirkiyeyê ne û got, “Heta ku Birêz Abdullah Ocalan azad bibe meşa me wê dewam bike.”
PEYAMA OCALAN LI ENQEREYÊ HATE XWENDIN
Piştre peyama ku Rêber Apo ji jinên meşvan re şand hate xwendin û bi coşeke mezin hate pêşwazîkirin. Aktîvîsta TJA’yê Sabahat Tûncel piştre axivî û anîz iman ku wan 1’ê Cotmehê dest bi meşê kirin, ji bajarên qedîm ên Kurdan derbas bûn û got, “Em bi daxwaza edaletê ya gelê Kurd bi rê ketin. Em baş zanin bê giraniya pirsgirêka Kurd çi ye. Ji ber vê yekê jî daxwaza aştiyê ji bo me mecbûriyeteke.” Sabahat Tûncel got, “Li kîjan devera cîhanê dibe bila bibe, em di bin zexta sîstema serweriya mêr de ne. Lewma li ku dibe bila bibe bi gotina ‘Jin, Jiyan, Azadî’ em piştevaniya jinan mezin dikin. Em bi hesreta aştiyê bi rê ketin. Li her cihê ku em jê derbas bûn me daxwaza aştiyê anîn ziman. Daxwaz bi tenê têrê nake. Ji ber vê yekê em hatin Enqereyê.”
‘WERIN EM AŞTIYÊ PÊKAN BIKIN’
Sabahat Tûncel destnîşan kir ku gelê Kurd li gel zext û zordariya lê hate kirin jî di aştiyê de israra dike û got, “Em ê daxwazan weke dosyayekê bi navê TJA’yê pêşkêş bikin. Em ê destnîşan bikin bê ji bo aştiyê divê çi bêne kirin. Ji ber ku aştî wezîfeya ne tenê wezîfeya desthilatdariyê ye, wezîfeya hemû partiyên siyasî ye. Lewma em bang li hemû partiyên siyasî dikin; werin em bi hev re aştiyê pêkan bikin. Garantiya aştiyê valakirina girtîgehan e. Ji ber vê jî beriya her tiştî Girtîgeha Îmraliyê vala bikin, divê Birêz Ocalan azad bibe. Birêz Ocalan got, ‘Azadiya civakê azadiya min e’. Pênaseya azadiyê ya Birêz Ocalan bi wate ye. Li gel ku 27 sal in tecrîdkirî ye azadiya xwe nade pêş. Azadiya gel dide pêş. Em vê yekê baş fêhm dikin û dibêjin, azadiya Birêz Ocalan azadiya gel e, azadiya jinan e.”
‘DIVÊ PÊŞNIYARA OCALAN BI CIH BÊ ANÎN’
Sabahat Tûncel ragihand ku ji bo avakirina aştiyê divê her kes bi erk û wezîfeya xwe rabe, bal kişand ser peyama Rêber Apo ya ji bo jinan û got, “Demokrasiya muzakereyê çi ye? Ne serweriya wê hêzê ye ku di hilbijartinê de dengê herî zêde bi dest xistiye. Li Tirkiye û Kurdistanê pêşîvekirina li her kesî ya ji bo tevlîbûna li siyaseta demokratîk e. Bi polîtîkaya înkar û îmhayê ev mesele çareser nabe. Lewma em pêşniyarê li hemû aliyan dikin ku pêşniyara siyaseta muzakereyê û demokratîk a Birêz Ocalan bi cih bînin.”
‘DIVÊ GAVÊN HIQÛQÎ Û SIYASÎ BÊNE AVÊTIN’
Sabahat Tûncel diyar kir ku yekane gava ku dewletê heta niha avêtiye avakirina komîsyonê li meclîsê ye, lê belê guhertinên qanûnî yên divê bêne kirin hîn nehatine kirin. Sabahat Tûncel got, “Em li bendê ne ku ji bo çek bi temamî ji holê bêne rakirin gavên hiqûqî û siyasî bêne avêtin. Ev têkoşîn wê ji bo jinan bi vî rengî neqede. Em ê meşa xwe dewam bikin. Em bi hêviyê dimeşin. Em ber bi azadiyê ve dimeşin.”
