Daxuyaniya MXDŞ’ê bi vî rengî ye:
“Em weke Rêveberiya Xweser û Demokratîk a Şengalê (MXDŞ) ji ber erka nû ya Birêz Dr. Berhem Ahmed Salih ya ji bo Komîseriya Bilind a Kar û Barên Koçberan a Neteweyên Yekbûyî (UNHCR) pîroz dikin û di karê wî yê nû yê mirovî de serkeftinê dixwazin.
Weke civaka Êzidî û bi taybet jî Rêveberiya Xweser a Şengalê ji hatina ser kar a Birêz Dr. Berhem Salih em kêfxweş in û em dizanin, di vê dema herî aloz, şer û nexweşiyê de ku bûye sedema koçberbûna milyonan mirovî, dê ji berê jî zêdetir roleke pozîtîf a mirovî bilîze. Ev erka nû erkeke wijdanî û miroviye ku em bawer dikin kesayeteke wek Birêz Dr. Berhem wê bi layiqî bi vî karî rabe.
Birêz Dr. Berhem Salih xwedî kevneşopiyeke dûdirêj a têkoşîn û mafparêziyê ye. Xwedî ezmûnên girîng ên siyasî ye. Li Iraqê û Başûrê Kurdistanê gelek wezîfeyên girîng girtiye û di dema karê xwe de roleke pozîtîf ji bo gelan lîstiye. Bi taybet hewl daye bibe nûnerê hemû gelan û ferq nexistiye navbera gel û baweriyan. Niha jî ji bo erkeke pir girîng hatiye hilbijartin ku wê ji çavdêrîkirina rewşa 123 milyon koçberî berpirsyar be. Ev jî karekî wijdanî, xêrxwazî û mirovî ye. Em bawerin dikin wê bêyî ferq û cûdahî bi hawara hemû koçberan ve biçe û ji bo hemû mirovên di tengaviyê de bibe hêvî.
Ji ber fermana 3’yê Tebaxa 2014’an a DAÎŞ’ê ya li ser Şengalê bihezaran kes ji Şengalê koç kirin. Beşeke zêde ya koçberan li kampên Herêma Kurdistanê bicîh bûn. Tevî ku Şengal rizgar bûye hîn jî bi hezaran koçber li kampan di nava şertên zehmet de dijîn. Ji ber peymana 9’ê Cotmehê di dema Mistefa Kazimî de hate îmzekirin hîn jî koçber nikarin bi îradeya xwe vegerin ser cih û warê xwe. Alîkariya pêwîst a ji bo qerebûkirina koçberan jî ne hatiye kirin. Em hêvî dikin wê Dr. Berhem Salih ji bo vegera Şengalê û qerebûkirina wan roleke pozîtîf bilîze û dosyaya koçberên Êzidî di sala nû de bi encam bike. Evê ji bo civaka me ya Êzidî bibe kêfxweşî û hêviyeke mezin ji bo li ser cih û warê xwe careke din bi aramî û azadî bijî.
Weke civaka Êzidî û bi taybet jî weke Rêveberiya Xweser a Şengalê em Birêz Dr. Berhem Salih, weke dostekî civaka xwe û endamekî fexrî yê Şengalê dibînin. Em bawer dikin dê karên ji bo vegera Şengalê bike, kêmek jî be wê bikare birîna fermanê bikewîne û di avadankirina Şengalê de erka dikeve ser milê xwe bilîze.
Em dubare bi navê civaka xwe wezîfeya we ya nû pîroz dikin û di karê we de serkeftinê dixwazin. Em weke Rêveberiya Xweser a Şengalê li ser navê civaka Êzidî Birêz Dr. Berhem Salih vedixwînin Şengalê û em ê kêfxweş bin li Şengalê pêşwazî lê bikin.”
