Fermandariya Giştî ya Hêzên Ewlekariya Hundirîn a Herêma Bakur û Rojhilatê Sûriyeyê der barê şehadeta 2 endaman de daxuyaniyên nivîskî weşandin.
Di daxuyaniyekê de hate ragihandin endamê Hêzên Ewlekariya Hundirîn Haşim Dêrik (Remezan Mihemed) dema erka xwe ya nîştimanî bi dilsozî û lehengî bi cih dianî gihaşt asta şehadetê.
Hate gotin “Şehîd Haşim Dêrik ji malbateke welatparêz e ku bi têkoşîna xwe ya rûmetê tê naskirin. Bavê 3 zarokan e, lê berpirsyariyên wî yên malbatê li pêşiya tevlêbûna wî ya nava tevgera rizgariya Kurdistanê nebû asteng. Ji 35 salan ve jiyana xwe ji bo parastina azadî û rûmeta gelê xwe veqetand. Bû sembola rihê neteweyî yê fedaî. Di dirêjahiya têkoşîna wî de li her çar aliyên Kurdistanê xwedî roleke girîng bû û şopên bi rûmet hiştin.
Bi destpêka Şoreşa Rojava re, şehîd Haşim yek ji kesên pêşîn bûn ku banga şoreşê bi cih anî. Bi baweriyeke mezin û îradeya ku nayê şikandin di tevahî qadên leşkerî, siyasî û civakî de cih girt. Bi hêza xwe ya derbaskirina astengî û pirsgirêkan, bi mejiyê xwe yê çareserkirina pirsgirêkên li pêşiya xebata şoreşgerî dihat nasîn. Ji ber vê yekê bû mînaka fedakarî û berpirsyariyê.
26’ê Çileyê dema bi lehengî bersiva êrişên li ser gundê Safa yê navçeya Çilaxa dida hevrêyê têkoşer Haşim Dêrik gihaşt asta şehadetê. Bi rihê xwe yê neteweyî yê bilind û coşa xwe ya şoreşgerî bû mînak. Bû mûmek ku rêya jiyana azad ya gelê xwe ronî kir.
Di daxuyaniyek din de jî hate gotin ku endamê Hêzên Antîteror (HAT) ên kantona Cizîrê, Beşar Xelîl bi lehengî parastina erd û rûmeta gelê xwe kir, di êrişên komên çekdar ên girêdayî wezareta parastinê ya Sûriyeyê de li gundê Safa yê Çilaxa şehîd bû.
Di dewama daxuyaniyê de ev agahî hatin parvekirin: “Şehîd Beşar lehengê hêzên taybet bû. Sembola lehengî û fedakariyê bû. Di nava hêzên taybet de gelek mîsyon pêk anîn. Bi aramî, lehengî, hêz, biryardarî û zîrekiya xwe dihat naskirin. Lew ra di hemû mercan de bû fermandarekî meydanî.
Di şerekî giran de şehîd bû. Ji bo parastina gelê xwe di refên pêşîn de şer dikir. Tevî xetereyan jî li cihê xwe bû. Fedakariya wî îfadeya herî dirust a hezkirina wî ji welatê wî re bû. Şehîd Beşar sembola lehengiyê dê di bîra her kesî de bimîne.”
Fermandariyê di daxuyaniya sêyemîn de jî şehadeta endamê xwe Ehmed Mistefa ragihand.
Di daxuyaniyê de hate gotin: “Hevrêyekî me yê Hêzên Operasyonan piştî bexwedaneke lehengane ya parastina erd û rûmeta gelê xwe raber kir, di êrişên komên çekdar ên girêdayî wezareta parastinê de şehîd bû.”
Şehîd Ehmed mînake lehengî û israrê bûn. Ji kêliya pêşîn a şer ve li rêzên pêşîn bû. Li hemberî hemû mercan disekinî. Ne wekî şervan, lê wekî fermandarekî şer dihat dîtin. Rê nîşanî hevalên xwe dida û di kêliyên herî zehmet de piştevanê hevrêyên xwe bû.
Fermandariya Hêzên Ewlekariya Hundirîn sersaxî ji malbatên şehîdan re xwest û soza parastina gel û herêmê da.
Agahiyên der barê nasnameyên şehîdan wiha ne:
Nasnav: Haşim Dêrik
Nav û paşnav: Remezan Mihemed
Navê dayikê: Şêrîn
Navê bav: Osman
Cih û dîroka jidyikbûnê: Gir Ziyarat- 1-1-1956
Dîroka tevlêbûnê: 1988
Cih û dîroka şehadetê: Gundê Safa-Çilaxa- 26-1-2026
***
Nav û paşnav: Beşar Xelîl
Navê dayikê: Mehiye
Navê bav: Bedirxan
Cih û dîroka jidayikbûnê: Dirbêsiyê-4-12-2002
Cih û dîroka tevlêbûnê: 10-5-2023
Cih û dîroka şehadetê: Çilaxa-Gundê Safa-26-1-2026
***
Nav û paşnav: Ehmed Mistefa
Navê dayikê: Şerîfe
Navê bav: Ebdulmecîd
Cih û dîroka jidayikbûnê: Serêkaniyê-2007
Cih û dîroka şehadetê: Reqa-16-1-2026
