Hate ragihandin ku parêzvana mafên mirovan a Îranî Nêrgiz Mihemmedî ji nexweşxaneya li Tehranê derketiye û vegeriyaye mala xwe.
Nêrgiz Mihemmedî ya 54 salî ku xwediya Xelata Nobelê ya Aşitiyê ya sala 2023’an e, piştî ku di meha kanûnê de hatibû girtin û rewşa wê ya tenduristiyê giran bibû, di 10’ê Gulanê de bi kefaletê hatibû berdan û ji bo ku di bin çavdêriya bijîşkên xwe yên taybet de tedawî bibe, sewqî nexweşxaneyê hatibû kirin.
Di daxuyaniya ku ji aliyê weqfa Nêrgiz Mihemmedî ve hatî dayîn de hate diyarkirin ku aktîvîst roja yekşemê ji beşa rehabîlîtasyonê a Nexweşxaneya Pars a li Tehranê hatiye derxistin.
NABE KU CAREKE DIN BÊ GIRTIN
Di daxuyaniya weqfê de hate destnîşankirin ku pirsgirêkên tenduristiyê yên Nêrgiz Mihemmedî ji ber zextên pîskolojîk ên demdirêj, fikarên kronîk û stresa giran peyda bûne.
Keça Mihemmedî û Hevseroka Weqfa Nêrgizê Kiana Rahmanî diyar kir ku pêwîstiya diya wê bi bêhnvedanê û çavdêriya bijîşkî ya berdewam heye û got: Pêwîst e ew li dervayî girtîgehê bimîne. Divê hemû tohmetên li ser wê bên betalkirin û careke din tu carî neyê girtin.
Di daxuyaniya weqfê de her wiha ev gotin hatin bikaranîn: Piştî pêvajoya girtîgehê ya zêdetirî deh salan, laşê wê êdî nikare bargiraniya zext û streseke nû rake.
Nêrgiz Mihemmedî, piştî merasîmeke cenazeyê ku tê de rexne li rayedarên olî yên Îranê girtibûn, di 12’ê Kanûnê de li bajarê Meşhedê hatibû desteserkirin û girtin.
Mihemmedî ku li Îranê bi têkoşîna xwe ya di warê mafên jinan û mafên mirovan de tê naskirin, di sala 2023’an de hêjayî Xelata Nobelê ya Aşitiyê hatibû dîtin.
