Serokê DYE’yê Donald Trump û Serokwezîrê Îsraîlê Binyamin Netanyahu, li Qesra Spî civîneke çapemeniyê ya hevpar li dar xistin û plana ji 20 xalan pêk tê ya ji bo rawestandina şerê li Xezeyê ragihandin.
Trump di çarçoveya planê de got ku herdu alî wê agirbestê îlan bikin, hemû girtîyên di destê Hamasê di nav 72 seatan de bêne berdan û hêzên Îsraîlê biqedeme wê hêdî hêdî ji Xezeyê vekişin. Û divê welatên Ereb û Misilman jî berpirsyariya bêçekkirina Xezeyê hildin ser xwe.
Plan, damezrandina hikûmeteke demkî ya ku ji aliyê saziyeke navneteweyî ve tê rêvebirin pêşniyar dike. Trump di vê pêvajoyê de wê serokatiya “Desteya Aştiyê” bike û di desteyê de Serokwezîrê berê yê Brîtanyayê Tony Blair jî cih bigire.
Netanyahu, plan wekî “ji bo Xezeyê rêya rast” binav kir û got ku bêçekkirina Hamasê wê asta xwevekişandina hêzên Îsraîlê diyar bike. Netanyahu ji ber êrîşa li Katarê lêborîn xwest û got ku Rêveberiya Filistînê bêyî “guhertineke radîqal” nikare li Xezeyê rolê bigire.
Trump û Netanyahu di civîna çapemeniyê de pirsên rojnamegeran qebûl nekirin. Û rayedarên Hamasê jî gotin ku plan hîn bi nivîskî negihîştiye wan. Û heke Hamas pêşniyazê red bike, Trump got ku ew ê piştgiriyeke tam bidin Îsraîlê ji bo “temamkirina karê tunekirina van gefan li ser Îsraîlê.”
Rayedarê Hamasê Mahmud Mardawî, piştî civîna çapemeniyê ya hevpar a Trump û Netanyahu di hevpeyvîneke bi El Cezîre Mubaşer TV re got ku Hamas hîn plana aştiya Xezeyê ya nivîskî ya Donald Trump negirtiye.
