Komîteya Amadekar a Newroza Rojava bi daxuyaniyekê bernameya Newroza îsal eşkere kir. Daxuyanî li pêşiya Navenda Çand û Hunerê ya Mihemed Şêxo ya li bajarê Qamişloyê bi amdebûna endamên Tevgera Çand û Hunera Demokratîk, nûnerên Rêveberiya Xweser, malbatên şehîdan, endam û rêveberên meclisa bajar û şêniyên Qamişloyê hate dayîn.
Endamê Komîteya Amadekar a Newrozê Keder Hisên bi zimanê kurdî endama Meclisa Kongra Star Rîhan Temo bi zimanê erebî daxuyanî xwend.
Di daxuyaniyê de hate got, ”Newroz di bîra dîrokî ya gelê Kurd de ne tenê cejneke, lê di heman demê de sembola berxwedana li dijî zulmê ye. Baweriya azadî û ji nû ve vejînê ye. Agirê azadiyê ku Kawayê Hesı̂nkar li dijî zalim Dehak şewitand, bi sedan salan berdewamî rêya berxwedanê ya gelê Kurd ronî kir. Îro jî agirê Newrozê ku li Rojava, Rojhilat, Başûr û Bakur tê vêxistin berdewamiya vê mîrateya berxwedanê ya dîrokî ye. Gelê Kurd di dirêjahiya dîrokê de, tevî siyaseta înkar, zordarî û tunekirinê karîbû ziman, çand û nasnameya xwe biparêze. Bi saya rihê berxwedanê Kurdan îro jî têkoşîna xwe ya ji bo azadî, demokrasî û jiyaneke bi rûmet didomînin, agirê Newrozê jî sembola vê îrade û biryarê ye. “
Di daxuyaniyê bal hat kişand ser yekrêziya neteweyî ya Kurdî û wiha hate gotin: “Agirê Newrozê ku li Rojava bilind dibe, di heman demê de agirê daxwaza yekitiya neteweyî ya gelê Kurd e. Dîrok nîşan daye ku parastina destkeftiyên Kurdan û mezinbûna azadiyê tenê bi yekitiya neteweyî pêk tê. Her çi qas em xwedî raman û nêzîkatiyên siyasî yên cihê bin jî, îro yekbûna li dora nirxên hevpar û mafên neteweyî yên gelê Kurd berpirsyariyeke mezin e.”
Di berdewamiya daxuyaniyê de hate destnîşankirin ku ruhê Newrozê ji wan re berxwedan, hevkarî û têkoşîna bi hev re fêr dike û hate gotin “Gelê Kurd li ser van axan ne tenê ji bo azadiya xwe, lê di heman demê de ji bo jiyana azad û demokratîk a hemû gelan jî têkoşîn dike. Ruhê berxwedanê yê jinên Kurd û rola wan a pêşeng di têkoşîna azadiyê de jî bi agirê Newrozê re dibe yek û rêwîtiya azadiyê ya gelê hêzdar dike. Em dizanin îro gelê Kurd di siyaseta tunekirina û jenosîda li dijî Kurdistanê re rû bi rû ne, duh li Bakur û Rojava, îro jî li Rojhilat û Başûrê Kurdistanê li dijî gelê me siyseta jenosîdê tê meşandin. Li çar parçeyên Kurdistanê divê em bi ruhê ku Rêber Apo ji bo parastina hebûna Kurd û misogerkirina azadiyê û bi çareseriya yekitiya neteweyî ya demokratîk dane destîşan kir, agirê Newrozê bi hişmendiya yekitiya neteweyî bilind dikin û li dijî van êrişan radewestin.”
Komîteya Amadekar a Newrozê li Rojava bang li gel kir ku li dijî her cûreyên êrişên li ser çar parçeyên Kurdistanê rawestin û wiha pê de çû “Bi ruhê yekitiya neteweyî rabin ser piyan. Gel û welatê xwe biparêzin. Ji ber vê yekê ew hêvî dikin ku Newroza (2026) bibe sedema avabûna hêza parastin hevpar a Kurdistanê . Ji bo vê armanê divê hemû tevgerên Kurdistanî berpirsiyariya xwe ya dîrokî pêk bînin. Avakirina yekitiya neteweyî û hêza parastina neteweyî ne bijarteke, ji bo gelê Kurd pêdiviyeke hebûnê ye. Em weke Komîteya Amadekar vê salê Newrozê wek cejna ku ruhê berxwedanê ya gelê Kurd, yekitiya neteweyî ya demokratîk û nirxên civakî mezin dike, pîroz dikin. Em bang li hemû gelê xwe dikin, qadên Newrozê bikin qadên rûmeta gelê Kurd, yekitiya wî û îradeya azadiyê. Li ziman, çand û nirxên xwe yên civakî xwedî derkevin. Em ji bîr nekin ku agirê Newrozê ne tenê berxwedana raboriyê ronî dike, lê pêşeroja azad jî ronî dike.”
Di daxuyaniyê de bernameya Newrozê jî hat eşkerekirin û hate gotin, “Pîrozbahî dê li 7 navendan di bin vê dirûşma ‘Bi rihê yekitiya neteweyî em ê agirê Newrozê geş bikin’ were pîrozkirin”.
Li gorî daxuyaniya Komîteya Amadekar, cih û saetên pîrozbahiyan wiha ne:
DÊRIK
Cih: Qada Şehîd Çîçek
Saet: 11.00`an
GIRKÊ LEGÊ
Cih: Hilêq
Saet: 11.00`an
TIRBESPIYÊ
Cih: Dirêjîk
Saet: 11.00`an
QAMIŞLO
Cih: Hîmo
Saet: 11.00`an
AMÛDÊ
Cih: Çaxir Bazar
Saet: 11.00`an
DIRBÊSIYÊ Û TIL TEMIR
Cih: Çolbistan
Saet 11.00`an
HESEKÊ
Cih: Sed
Saet: 11.00`an
Komîteyê di dawiya daxuyaniyê de Newroz li tevahî gelên herêmê pîroz kir. Piştre agirê Newrozê ji aliyê malbatên şehîdan ve hat pêxistin.
