Li navçeya Gimgim a Mûşê pîrozbahiya Newrozê ya “Azadî û Yekîtiya Demokratîk” li qada Koxê pêk hat. Şêniyên navçeyê bi kincên xwe yên gelêrî û rengên kesk, sor û zer beşdarî pîrozbahiyê bûn. Çalakiyê bi deqeyeke rêzgirtinê ya ji bo bîranîna şehîdan destpê kir.
Hevşaredara Gimgimê Gulbahar Kaya li pîrozbahiyê axivî û got, “Hezar silav ji Kawayan re ku li hemberî Dehaqan li ber xwe dan. Newroz pîroz be.” Hevşaredarê Gimgimê Giyasettîn Aydemîr jî anî ziman ku Newroza îsal Newroza azadiyê ye. Aydemîr diyar kir ku Newroz nîşaneya aştî û berxwedanê ye û got, “Agirê Newrozê jiyana azad diafirîne. Kurd bi sedan sal in vî agirê berxwedanê gur dikin. Îro pêvajoya aştiyê tê meşandin. Em bawer dikin ku Abdullah Ocalan ê ku ev pêvajoya aştiyê da destpêkirin wê azad bibe.”
Hevserokê Bajarê Mûşê yê Partiya Herêman a Demokratîk (DBP) Ûmût Yilmaz jî got, “Em ê nehêlin ku kes destê xwe bide av û xwezaya Gimgimê. Partiyeke Gimgimê heye ku di her hilbijartinê de ji sedî 90 ê dengan werdigire. Xwediyên Gimgimê hene. Ez dixwazim ji vê derê bang li desthilatdariyê bikim. Birêz Ocalan rola xwe ya dîrokî bi cih anî. Niha dor a we ye. Ji her maleke li vê derê kesek li zindanê, li sirgûnê ye. Gimgim daxwaza avêtina gavên qanûnî û destûra bingehîn dike.”
Hevseroka Bajarê Mûşê ya Partiya Demokrasî û Wekheviyê ya Gelan (DEM Partî) Çîçek Tûtûş jî anî ziman ku ew Newrozê diyarî Rêber Apo dikin û banga azadiya fîzîkî ya Rêber Apo û statuya Kurdan ji keleha berxwedanê dikin.
Îlyas Aslan jî diyar kir ku firsend heye ku Newrozê veguherînin mîladê û destnîşan kir ku Newroz rêya rizgariyê nîşanî Rojhilata Navîn dide.
Piştî axaftinan girseya gel bi coş govend gerand. Di dema govendê de agirê Newrozê hate dadan, ciwanan li dora êgir govend gerandin û xwe di ser agirê Newrozê re çeng kirin.
