Nivîskar Herdem Merwanî anî ziman ku weke nivîskareke Kurd ew naxwaze pêvajoyê ji siyasetmedaran, ji parêzeran guhdarî bike, ew dixwaze yekser ji Rêber Apo guhdarî bike û got, “Yekane dermanê vê êşê aştî ye.”
Nivîskar Herdem Merwanî li ser pêvajoya ‘Aştî û Civaka Demokratîk’ ji ANF’ê re axivî û got, “Ev pêvajo ji bo me bû hêvî. Li hemberî vî şerê giran êdî her kes dixwaze pêvajo bi aştiyê bi encam bibe. Şer ne ji bo Kurdan, ne ji bo Tirkan ne jî ji bo gelên Rojhilata Navîn bi kêr hat.”
DIVÊ DEWLET GAVÊN GIRÎNG BIAVÊJE
Herdem Merwanî ragihand ku pêvajoya aştiyê divê pêwîstiyek be û got, “Bêguman bi rengekî yekalî divê neyê meşandin. Dema ku mirov bala xwe didin ser pêvajoyê, dibînin ku çek hate danîn, çek hate şewitandin, xwe fesix kir. Ev gavên gelekî girîng bûn. Me texmîn nedikir ku gaveke bi vî rengî bê avêtin. Li hemberî van gavan diviyabû dewletê jî gavên girîng biavêtibûya. Girtiyên siyasî hemû divê bi hev re azad bibûna. Eger bi vî rengî bibe hingî wê gaveke mezin hatibe avêtin. Gavên biçûk ên ji ailyê dewletê ve hatin avêtin bersivê nadin pêvajoyê.”
EM DIXWAZIN JI RÊBER APO GUHDAR BIKIN
Herdem Merwanî destnîşan kir ku aktorê bingehîn ê ku pêvajoya aştiyê daye destpêkirin Rêber Apo ye û got, “Weke Kurdek û nivîskarekê ez naxwazim ji siyasetmedaran, ji parêzeran pêvajoyê guhdarî bikim, ez dixwazim ji Birêz Ocalan guhdarî bikim. Ev jî mafê me yê herî xwezayî ye. Dixwazim ji mîmarê vê pêvajoyê hîn bibim. Di vê mijarê de divê her kes xwedî li pêvajoyê derkeve û beriya her tiştî Birêz Ocalan azad bibe. Bi vî rengî her kes wê hîn bêhtir xwedî li pêvajoyê derkevin.”
AŞTÎ YEKANE DERMANÊ ÊŞÊ YE
Bi dewamî Herdem Merwanî anî ziman ku ji bo aştiyê divê dewleta Tirk berpirsyariyên xwe bi cih bîne û got, “Heta ku dewlet bi berpirsyariyê ranebe wê aştî pêk neyê. Dem êdî dema gavavêtinê ye, ne dema gotinê ye. Dema ku aliyekî gav avêt, aliyê din jî divê bi berpirsyariya xwe rabe û li gorî wê tevbigere. Li gel vê êş û windahiyên giran jî eger em di aştiyê de israr dikin, dewleta Tirk jî divê di aştiyê de israr bike. Aştî dermanê vê êşê ye.”
