Ji bo pêvajoya “Aştî û Civaka Demokratîk” a ku ji aliyê Rêber Apo ve tê birêvebirin, piştgiriya navneteweyî didomin. Nûnerê Daîmî yê Neteweyên Yekbûyî yê Tevgera Hevgirtina Gelan a li Dijî Nijadperestiyê (MRAP), derbarê pêvajoyê de nirxandin kir.
Fattorini diyar kir ku pêvajoya ku li Tirkiyeyê tê meşandin ji bo aştiya civakî derfetek girîng e û destnîşan kir ku ji bo aştiyek mayînde, divê li şûna polîtîkayên ewlehiyê, sedemên bingehîn ên pirsgirêkê werin çareserkirin. Fattorini, anî ziman ku nakokiyên li Tirkiyeyê di serî de ji ber nenaskirina ziman, çand û mafên gelê Kurd in.
‘LI TIRKIYEYÊ ÎRADEKE BI HÊZ HÎN NEHATÎ RABERKIRIN’
Fattorini da xuyakirin ku şer encamên giran ên mirovî bi xwe re anîne û got ku pêvajoya aştiyê gaveke erênî ye, lê dewleta Tirkiyeyê hê jî îradeyeke xurt nîşan nedaye ku berpirsiyariyên xwe qebûl bike. Fattorini got ku tevî nebesî û kêmasiyan jî divê ev pêvajo bê dewam kirin.
‘DIVÊ OCALAN RASTERAST TEVLÎ PÊVAJOYÊ BIBE’
Gianfranco Fattorini, diyar kir ku beşdariya rasterast a Rêber Apo di pêvajoyê de girîng e û rola çalak a Nelson Mandela di pêvajoya aştiyê ya li Efrîkaya Başûr de bi bîr xist. Fattorini, diyar kir ku divê rayedarên Tirkiyeyê şert û mercên Rêber Apo ava bikin.
‘DIVÊ CIVAKA NAVNETEWEYÎ BERPIRSYARÎ BIGIRE’
Fattorini anî ziman ku weke MRAP’ê di nava Neteweyên Yekbûyî de gelek hewldan kirine û got ku divê civaka navneteweyî û mekanîzmayên mafên mirovan, bi taybetî di derbarê rewşa gelê Kurd de, bêtir berpirsiyariyê bigirin ser xwe.
