Di şerê ku ji Avrêla 2023’yan vir ve di navbera artêşa Sûdanê û Hêzên Piştgiriya Bilez (HDK) de didome de, bi deh hezaran kesan jiyana xwe ji dest dan. Li gorî NY’yê, şer bû sedema koçberbûna zêdetirî 14 milyon kesan li hundir û derveyî welat û krîza herî giran a mirovî ya cîhanê derxist holê.
Turk, di civîneke çapemeniyê de ku li Port Sûdanê hate lidarxistin, bal kişand ser ku civak her ku diçe zêdetir dibe mîlîtarîze, sivîl tên çekdarkirin û zarok bi darê zorê tevlî şer dibin. Turk, xerckirina çavkaniyan ji bo dabînkirina çekên pêşketî bi taybetî dronan, li şûna sivikkirina êşên gel, wekî “şermezarî” binav kir.
Komîserê Bilind diyar kir ku êrîşên li ser binesaziyên sivîl ên mîna nexweşxane, dibistan û bazaran zêde bûne û bang kir ku hemû êrîşên li ser sivîlan demildest bên rawestandin. Turk bal kişand ser mînakên “wehşeta bêtehemul” ên mîna lêdan, înfaz, êrîşên zayendî û revandinê yên ku di dema kontrola HDK’yê de li Darfûrê qewimîne û hişyarî da ku metirsiya dubarebûna sûcên bi vî rengî li herêma Kordofanê jî heye.
Turk ragihand ku hêzên HDK’yê paytexta Kordofana Başûr, Kadugli û bajarê Dillingê zêdetirî 19 mehan e di bin dorpêçê de digirin û bajarê El-Obeid ê li Kordofana Bakur jî nêzî salekê ye hatiye dorpêçkirin. Turk tekez kir ku bi taybetî tundiya zayendî sûcekî şer e û diyar kir ku delîlên bihêz hene ku ev sûc bi rengekî berfireh û sîstematîk tên kirin.
