18’ê Sibatê Artêşa Iraqê li naverasta bajarê Şengalê kemîn avêtibû pêş wesayîteke şervanên YBŞ’ê û gulebaran kiribû. Di encamê de 3 şervanên YBŞ’ê birîndar kiribûn. Her wîha tevî birîndaran 5 şervan jî dîl girtibûn. Ji wê rojê heya niha tevî hemû nerazîbûn û bangawaziyên Şengaliyan jî şervanên YBŞ’ê hê nehatine berdan.
Îro Desteya Oldaran a Şengalê têkildarî siyaseta Iraqê ya dijî hêzên parastinê ya Şengalê û dîlgirtina şervanan li ber Quba Serêkaniyê ya Serdeşta Çiyayê Şengalê daxuyaniyeke çapemeniyê da. Daxuyaniya Desteya Oldaran a bi zimanê Erebî, ji aliyê oldar Şivan Selam ve hate xwendin û hate gotin, çi li Şengalê rû bide wê artêşa Iraqê weke berpirsyar bê dîtin.
ARTÊŞA IRAQÊ ZAROKÊN ME DESTESER KIRINE
Oldarên Êzidî diyar kirin 5 zarokên Êzidî ji aliyê Artêşa Iraqê ve hatine desteserkirin û gotin: “Herkes dizane ku di dema fermana 2014’an de bi hemû hêz û îradeya xwe li ber xwe dan û axa xwe parastin. Girtina wan zilmek e ji bo me tevan.’’
DARBEYEKE LI DIJÎ CIVAKA ÊZIDÎ YE
Oldaran dan zanîn girtina şervanan derbeyeke li dijî îradeya Êzidiyan e û wiha hate gotin: “Girtina van her 5 zarokên me darbeya li dijî îradaye civaka Êzidî ye û dixwazin baweriya wan bi şervanên wan bişkînin. Di roja me ya îroyîn de hîna jî ferman berdewam e. Em bi guman in û girtina wan ne di çarçoveya berjewendiya kesî de ye. Ji ber ku zarokên me parastina Iraqê kirine. Lê dewlet navên cuda cuda li wan dike, wan weke ‘terorê’ bi nav dike. Lê îro, hemû terorîst serbest in û yên şerê terorê kirine jî di hedefa wan de ne.”
DEMILDEST ZAROKÊN ME BERDIN
Desteya Oldaran ya Şengalê bang li civaka navneteweyî û Iraqê jî kir ku demildest zarokên Êzidî berdin û wiha hate gotin: “Em weke civaka Êzidî, civaka herî kevnar in li Rojhilata Navîn û Iraqê. Em bang li Iraqê dikin demildest 5 zarokên me berdin, bêyî ku pirsgirêk mezintir bibe. Eger neyên berdan, wê artêşa Iraqê ji her bûyereke rû bide berpirsyar were girtin. Yan jî wê ji tiştên rû bide ew ê berpirsyar bin. Ji ber ku gelek alî bi daxuyaniyên xwe dixwazin rewşa heyî kûrtir û aloztir bikin.”
BES E JI BÊRÊZIYA LI BERAMBERÎ ÊZIDIYAN RE
Desteya Oldaran bang li civaka navneteweyî jî kir ku mudaxelaya rewşê bike ku û got: “Eger destwerdan li rewşê çênebe, wê rewşa herêmê bi temamî were guhertin û careke din bibe cihê pevçûnan.”
Daxuyanî bi gotina: “Bes e ji bêrêziya li hemberî Êzidiyan re, bes e ji hedef girtina Êzidiyan re’’ bi dawî bû.
