Meseleya ‘Mafê Hêviyê’ ku demeke dirêj e tê nîqaşkirin, di rêza destpêkê ya rojeva siyasetê de ye. Alîkarê Giştî yê MHP’ê Fetî Yildiz beriya çend rojan piştî civîna Komîsyona Demokrasî, Xwişk-Biratî û Piştevaniya Mîllî ya li Meclîsê hatiye avakirin, daxuyaniyek da û got, di mijara ‘Mafê Hêviyê’ de komîsyonê li hev kiriye. Bicihanîna ‘Mafê Hêviyê’ ji bo nîqaşên aştî û demokratîkbûnê gelekî girîng e.
Parêzer Mehdî Ozdemîr li ser ‘Mafê Hêviyê’ ji ANF’ê re axivî û got, “Ragirtina kesekî girtî bi biryara dadgehekê heta bi hetayê di çarçoveya qedexeya êşkence, kiryarên li dijî mirovahiyê û kiryarên xerab de, binpêkirina mafê hêviyê ye.
Têkildarî Birêz Abdullah Ocalan biryareke bi heman rengî ya pratîka dadgeriyê heye û 27 sal in bi cih tê anîn. Ev pêvajoya înfazkirina ceza bi tecrîdeke girankirî tê kirin. Mafê hêviyê bi esasî biryareke binpêkirinê ye ku Dadgeha Mafên Mirovan a Ewropayê têkildarî Birêz Abdullah Ocalan û sê kesên din wergirtiye. Û ev biryara binpêkirinê di halê hazir de ji aliyê Komîteya Wezîran a Konseya Ewropayê ve tê kontrolkirin.
Dema mirov ji aliyê pêvajoya Aştî û Civaka Demokratîk ve mijarê dinirxînin, Birêz Abdullah Ocalan hem ji ber ku muxatabê yekser ê vê pêvajoyê ye hem jî muzakerevanê sereke ye û pêvajoyê dimeşîne, ji bo rakirina mercên tecrîda girankirî di çarçoveya mafê hêviyê de, pêkanîna azadiya wî ya fîzîkî û bicihanîna ewlekariya wî, divê merc bêne sererastkirin.”
‘DIVÊ BIRYARA DADGEHA MAFÊN MIROVAN A EWROPAYÊ BI CIH BÊ ANÎN’
Ozdemîr destnîşan kir ku biryarên Dadgeha Mafên Mirovan a Ewropayê divê bi cih bêne anîn û axaftina xwe bi vî rengî dewam kir, “Ji bo biryara binpêkirinê ya Dadgeha Mafên Mirovan a Ewropayê têkildarî Birêz Ocalan wergirtiye di vê çarçoveyê de li Tirkiyeyê bi cih bê anîn, divê merc bêne afirandin. Ji aliyê pêvajoya Aştî û Civaka Demokratîk ve jî divê meseleya Kurd li ser zemîna hiqûqî bê rûniştandin. Avakirina vê zemîna hiqûqî jî bi bicihanîna hin pêwîstiyên hiqûqî dibe.
Ev yek jî bêguman bi bicihanîna welatîbûna destûra bingehînî, welatîbûna wekhev, pêkanîna mafê hînbûna Kurdî û gelek guherînên qanûnî û destûra bingehîn dibe.
‘QANÛNA TÊKOŞÎNA LI DIJÎ TERORÊ DIVÊ BÊ GUHERTIN’
Ji aliyê Mafê Hêviyê ve bi guherînên bingehîn ên li Qanûna Têkoşîna li dijî Terorê, Qanûna Înfaza Ceza û pêvajoya înfaza ceza re astengiyên li pêşiya ragirtina kesekî heta bi hetayê ya li girtîgehê dikare ji holê bêne rakirin. Ji bo vê jî divê guherînên qanûnî û destûra bingehînî bêne kirin û biryarên Dadgeha Mafên Mirovan a Ewropayê bi cih bêne anîn.”
‘AZADIYA BIRÊZ OCALAN WÊ TEVKARIYÊ LI PÊVAJOYÊ BIKE’
Mehdî Ozdemîr destnîşan kir ku bicihanîna mafê hêviyê wê tevkariyeke cidî li çareseriya meseleya Kurd ibke û got, “Naskirina mafê hêviyê, garantîkirina vî mafî bi guherînên qanûnî û destûra bingehînî bi rengê hiqûqî; ji bo Birêz Abdullah Ocalan û her kesên bi rengekî neheq cezayê girtîgehê yê heta bi hetayê yê girankirî li wan hatiye birîn wê bibe destketiyek. Gava ku mirov ji aliyê Birêz Ocalan ve dinirxînin, azadiya wî ya fîzîkî wê tevkariyeke girîng li çareseriya meseleya Kurd bike.”
