Serokê Giştî yê Partiya Komarê ya Gel (CHP) Ozgur Ozel piştî banga Rêber Apo ya dîrokî daxuyaniyek da.
Ozel li ser medyaya dijîtal daxuyaniyek da û got: ‘’Weke CHP’ê em helwesta xwe ya dîrokî ya çareserkirina hemû pirsgirêkên welatê me ya bi rêyên demokratîk didomînin.’’
‘EM Ê PIŞTGIRIYÊ BIDIN’
Ozel diyar kir ku ew helwesta xwe ya ku divê pirsgirêka Kurd di bin banê Meclîsê de, li gel hemû beşên civakê û bi awayekî zelal were çareserkirin, didomînin û got: ‘’Ji bo demokrasî, dewleta hiqiqê û aşitiya civakî û ji bo çareseriya di çarçoveya nêrîna hemû civakê, êrêkirina malbatên şehîdan, gaziyan û hemû mexdûran de em berpirsiyariya xwe dizanin. Em ê tevkariyên xwe bidomînin.’’
Ozel ev yek jî anîn ziman: ‘’Bêguman mijarên wiha ne bi daxwazan, bi bawerî û kiryaran tên çareserkirin. Çareserkirina hemû pirsgirêkên Tirkiyeyê bi dabînkirina aşitiya navxweyî pêkan e. Aşitiya navxweyî jî dê ne bi pergaleke otorîter, dê bi rêyên demokratîk, bicihanîna rêgezên dewleta hiqûqî, edalet û wekheviyê were dabînkirin. Bi qasî sererastkirinên qanûnî yên ji bo demokratîkbûyînê, bidawîbûna kiryarên derqanûnî û binpêkirinên li dijî qanûna bingehîn jî girîng in. CHP dê destûrê nede ku tu meqam, mewkî û aktor di çarçoveya hedefên xwe yên siyasî de daxwazên civakê yên têkildarî aşitî û demokrasiyê îstîsmar bikin. Girêdayî rêgeza ‘‘Li cîhanê aşitî, li welêt aşitî’’ya damezrînerê Komar û partiya me Mustafa Kemal Ataturk, em ê hemû caran piştgiriyê bidin hewlên ji bo aşitî û demokrasiyê û li dijî şer, teror, pevçûn û otokrasiyê bisekinin.’’
