Serokê Giştî yê CHP’ê Ozgur Ozel li Meclisê di civîna koma partiya xwe de li ser banga dîrokî ya Rêber Apo axivî.
Ozel têkildarî pirsgirêka Kurd û pêvajoya heyî axivî û got: “Di pirsgirêka Kurd de pêvajoyeke nû tê meşandin. Ditirsin navekî lê bikin… Pêvajoyeke ku tiştên dixwazin bikin vedişêrin dimeşînin. Ji me re dibêjin; ‘Dê hin tişt bibin, piştgiriyê bidin.’ Em jî dibêjin; ‘Şefaf bin, zelal bin. Werin Meclisê, bînin Meclisê, Meclisê bidin xebitandin. Rizaya gel, wekîlên wan bigirin.’ Hat ragihandin ku dê ji bo gavên qanûnî di navbera Wezareta Dadê û DEM Partiyê de hevdîtin were kirin. Bêguman divê tenê li ser milê şande û wezaretan nemeşe. Lê heke ev hevdîtin ji bo Meclisê zemînekê ava bike, bila bên kirin. Dema em dibêjin ‘sererastkirinên qanûnî, Meclis, qanûn’, ji me re dibêjin ‘hûn çima nabêjin Tirkiyeya bêteror.’ Dema em dibêjin ‘Divê meseleya Kurd bi rêyên demokratîk were çareserkirin’ ji me re dibêjin ‘Meseleya Kurd tune ye, tenê pirsgirêka terorê heye.’ Ev kesên wiha dibêjin piştî ku piyên wan gihiştin avê, niha hêdî hêdî qala sererastkirinên qanûnî, guhertina qanûnan dikin.”
Ozel axaftina xwe wiha domand: “Tevî ku em dizanin vê îktîdarê nesîbê xwe ji demokrasî, biratî, yekitî, heq û hiqûqê negirtiye jî, tevî helwesta MHP’ê jî weke CHP em li pey gotina xwe ya ji berê heta niha ne. Em bi hemû hewldanên jidil ên dawî li barîna hesirên dayikên Kurd û Tirkan tîne û rijandina xwînê digire û bi hemû aştî û muzakereyên jidil re ne. Em ê piştgiriyê bidin Tirkiyeya bêteror.”
