Parlamenterê berê yê HDP’ê Hişyar Oszoy dema nû ya bi banga Rêber Apo re ji ailyê PKK’ê ve hate destpêkirin ji ANF’ê re nirxand û diyar kir ku biryara PKK’ê destpêkeke nû ye û li ser vê bingehê têkoşîna siyasî ya Kurd wê hîn xurt bibe.
Ozsoy destpêkê Endamê Heyeta Îmraliyê Sirri Sureyya Onder bi bîr anî ku 3’ê Gulanê jiyana xwe ji dest da û got, “Gelek aliyên Sirri Sureyya hebûn, lê belê herî zêde aktîvîstekî aştiyê bû, weke sembolla têkoşîna aştiyê kete hişê mirovan. Salên dûr û dirêj weke hevrêyekî Birêz Ocalan ji bo pêşveçûna pêvajoyê kedeke mezin da. Ji pêvajoya çareseriyê ya 2012-2013’an û pê ve em dibînin ku piştî şerekî giran ê deh salan îradeyeke nû derketiye holê.”
BI QASÎ HÊVIYÊ XETERÎ Û RÎSK JÎ HENE
Ozsoy pêvajoya nû ya ku PKK’ê di encama hevdîtinên Rêber Apo yên bi dewletê re destpê kir, nirxand û işaret bi van xusûsan kir: “Li aliyekî rewşa Rêberê Gelê Kurd Birêz Abdullah Ocalan ku demeke dirêj di nava tecrîdê de ye, li aliyê din jî polîtîkaya zextdar a xeta Bahçelî-Erdogan. Bûyerên ku niha diqewimin ji aliyekî ve cihê hêviyê ye. Ji ber ku derfetên aştiyê jinûve diafirin, lê li aliyê din jî hêviyên ku di ber me de mane hene, lewma tirs û fikar hene. Yanî bi qasî derfet û hêviyê metirsî û rîsk jî hene.”
NE DAWÎ YE, DESTPÊKEKE NÛ YE
Ozsoy işaret bi înîsiyatîfa Rêber Apo kir û got, “PKK bi xwedîderketina li Rêberê xwe, fedakariyeke mezin dike ku li dora maseya danûstandinê destê wî xurt bike. Dema ku ji aliyê çarçoveya çanda fedakariyê ya dîrokî ya PKK’ê ve bê nirxandin, dibe ku ev yek weke çalakiyeke fedaî ya dawî be. Rêxistineke çekdarî ku xwedî rabirdûyeke zêdeyî 50 salî ye, gihîştiye asteke welê ku dawî li hebûna xwe bîne. Lê belê ev dawî nîne, ya rast destpêkeke nû ye. Îradeya jinûve rêxistinbûnê ye ku têkoşîna siyasî ya Kurd li Tirkiye û Kurdistanê, daxwazên demokrasî, edalet û azadiyê dûrî ji tundî û çekê bi amûrên rêxistinî yên nû, bi şêweyên têkoşînê yên nû û gotinên hû hîn bi biryardarî bê meşandin. Ev pêvajo divê bi vî rengî bê fêhmkirin.”
Hişyar Ozsoz destnîşan kir ku ji bo çareseriya pirsgirêka Kurd û pêkanîna aştiya civakî ev pêvajo gelekî hêja ye û got, “Em hêvîdar in ku bibe destpêkeke nû ku ciwan nemirin, dayik û bav negirîn. Van gotinan weke daxwazeke ji dil dibêjim. Hêvîdarim em ê atmosfereke welê biafirînin ku siyaset ne bi mirin, êşkence û girtîgehyê bê bîranîn, em karibin meseleyên xwe, di serî de meseleya Kurd bi rengekî azad, bêtirs nîqaş bikin û li çareseriyê bigerin. Bêguman pirsgirêk mezin in. Di serî de meseleya Kurd gelek pirsgirêkên me xwedî aliyên herêmî û navneteweyî ne, tevlîhev in Ev pirsgirêk ne ew pirsgirêk in ku ji nişka ve bi carekê çareser bibin.
Lê belê em hewl didin zemîn û derfetên çareseriya van pirsgirêkan di çarçoveya azadî û demokrasiyê de biafirînin. Sirri Sureyya jî yek ji wan mirovan bû ku ji bo avakirina vê zemînê tevkariyeke mezin kir. Eger aştî bê, ew ê jî bi dilrehetî razê. Bila ev jî bibe soza me ku me dane wî.”
