Serokê Giştî yê Partiya Tevgera Kedkar (EHP) Hakan Ozturk li ser nêzîkatiya AKP’ê ya li pêvajoyê û helwesta sosyalîstan ji ANF’ê re axivî.
Ozturk anî ziman ku AKP ji tecrûbeyên pêvajoya çareseriyê ya beriya niha helwestek ji xwe re diyar kiriye û têkildarî helwesta AKP’ê got, “Bi dîtina min du aliyên wê hene. Rêbazeke fikrî ya AKP’ê heye; ew jî bi wî rengî ye ku li gorî tecrûbeyên beriya niha tevdigere. Di wê baweriyê de ye ku di pêvajoya çareseriyê ya beriya niha de gava ku tabloyeke demokratîk derkete holê, têkoşerên demokrasiyê yên li Tirkiyeyê gelekî sûc jê wergirtin û bi pêş ve çûn. Di vê pêvajoya çareseriyê de hewl dide li vê baldar be û pêşî lê bigirin.
Ji aliyekî ve meseleya Kurd gelekî zelal û şênber e; divê bê çareserkirin. Hevsengiyên navneteweyî jî vê ferz dikin. Lê belê fikirîn ku dema ev dibe divê li Tirkiyeyê qadeke ji bo pêşketina demokratîk neyê vekirin. Ji ber ku di mejiyê xwe de şîroveyek bi vî rengî kirin: çareseriya meseleya Kurd bivê nevê wê bibe, lê belê bi dewama vê em çawa dikarin pêşî li demokratîkbûna Tirkiyeyê bigirin, çawa dikarin tenê weke naskirina hin mafên gelê Kurd bihêlin. Li gel vê yekê bi rengekî eşkere dest li CHP’ê tê werdan. Di vir de hem tişta kud estpêkê fikirîn dixin meriyetê, hem jî desthilatdariyeke ku ji wan re bibe alternatîf asteng dikin. Lewma du alî ye.”
Ozturk diyar kir ku di nava dewletê de şerek heye, aliyek dixwaze pirsgirêka Kurd bê çareserkirin, lê belê meyla din jî vê naxwaze. Ozturk di vê der barê de got, “Rewşeke du alî heye. Aliyek hîn bi şênberî, di asteke navneteweyî û cîhanî de li meseleyê dinihêre. Meylek li nava dewletê ev e; ‘Di meseleya Kurd de divê teqez gavek bê avêtin û maliyeta vê jî wê hîn kêm be. Eger em karibin vê bidin ber çavên xwe, em ê li cîhanê hîn bêhtir bi avantaj bin’. Li gel vê dibêjin, ‘Em di meseleya Kurd de gavekê biavêjin, vî karî bigihînin pozîsyoneke çareseriyê’. Bi dîtina min nûnerê vê jî Devlet Bahçelî ye, MHP ye.
AKP jî pêvajoya çareseriyê ya beriya niha ji xwe re dike mînak û difikire ku ev yek li dijî wê be, eger li Tirkiyeyê tiştek bi navê demokrasiyê pêk were, ev yek wê li hemberî wê be. Lewma di pêvajoya nû ya meseleya Kurd de bi rengekî berevajî li ber xwe dide.”
‘AKP NIKARE PÊVAJOYÊ SABOTE BIKEV, BERDÊLA VÊ WÊ GELEKÎ GIRAN BE’
Ozturk destnîşan kir ku AKP nikare pêvajoyê sabote bike, berdêla vê wê giran be û diyar kir ku bi komîsyona li meclîsê hate avakirin re hebûna meseleya Kurd êdî bi temamî hatiye qebûlkirin. Ozturk got, “Li pêşberî civakê, di asta navneteweyî de hate gotin, ‘Em vê meseleya Kurd binirxînin’. Her çend gotibin, ‘Em terorê dinirxînıin’ jî avabûna komîsyonekê li parlamentê tê çi wateyê? Tê wê wateyê ku meseleyeke civakî heye. Qebûlkirina vê ye, qebûlkirina hebûna vê ye. Li hemberî tabloya înkarê ku tevgera Kurd bi salan e tîne ziman, ew komîsyon qebûlkirina wê ye. Bi rengekî rûniştin û dest bi nîqaşê kirin.
Niha ew komîsyon ava bû, ev mijar tê nîqaşkirin, hate gotin ‘Divê bi vî rengî bê kirin’. Hate wê astê ku tê gotin, Abdullah Ocalan dikare nêrîna xwe bibêje. Devlet Bahçelî got, ‘Dikare sûdê ji mafê hêviyê werbigire’, ‘Dikare li Parlamentê biaxive’. Piştî van hemûyan eger rabin bibêjin, ‘Em ji vî karî vegeriyan, em nalîzin’, wê berdêla vê yekê gelekî giran be. Lewma zû bi zû nikarin bikin. Lê belê xwedî wê meylê ne ku li hember li ber xwe bidin. Eger aliyek hebe ku dixwaze ev kar astene bibe, neçe serî, bi dîtina min ew jî AKP ye.”
‘AKP DIXWAZE KU CHP JI DORA MASEYÊ RABE’
Ozturk anî ziman ku AKP dixwaze CHP’ê ji dora maseyê rake, vê pêvajoyê jî bê encam bihêle û got, “Bi destwerdanên li CHP’ê hewl didin bikin ku CHP bêzar bibe û bibêje, ‘Em bêzar bûn, destwerdanên bi vî rengî li hemberî me nabe; di rewşeke welê de ku destwerdan tê kirin, rabloyeke antî demokratîk heye, hebûna me ya li komîsyonê bê wate ye’ û xwe ji komîsyonê vekişîne.
CHP bi dengê xwe yê derdora ji sedî 35-40’î partiya herî mezin e ku dengê herî zêde bi dest xistiye. Vekişîna wê ya ji komîsyonê wê zerareke mezin bide komîsyonê. Di rewşeke welê de wê zerar li kê bibe? Ev pêvajo, ev pêvajoya nû ya ji bo çareseriya meseleya Kurd wê zerarê bibîne. Bi dîtina min tiştê di aqlê AKP’ê de ye ev e: Dikare bibêje, ‘Binihêrin CHP vekişiya, zêde wateyeke komîsyonê nema, bila ev pêvajo bi dawî bibe’. Lê belê maliyeta vê jî wê hebe. Lewma qet ne hêsan e.”
‘DIVÊ SOSYALÎST PÊVAJOYÊ ERÊNÎ PÊŞWAZÎ BIKIN’
Ozturk ragihand ku sosyalîst divê mafên gelê Kurd biparêzin, zêde bi gumanbarî nêzîk nebin û got, “Sosyalîst bi qasî Tevgera Kurd bala xwe nedane ser vê mijarê. Lê belê eger em pê re dakevin em ê karibin encamên gelekî baş bi dest bixin. Beriya her tiştî em mijarê ji nû ve dinirxînin. Ji bo çareseriya meseleya Kurd komîsyonek ava dibe, nîqaş têne kirin, heta astekê pêşî li vê yekê vedibe. Divê ev yek erênî bê dîtin. Ez vê yekê li hemberî dîtina neyînî û gumanên têne ser ziman dibêjim.
Em weke mirovên ku bi giranî demokrasiyê diparêzin, mafên mirovan ên gelê Kurd diparêzin, şensê me nîne ku em bibêjin, ‘Em di van hevdîtinan de nînin’. Ev yek nikare bê gotin. Ji ber vê jî dema ku em dibêjin, ‘Belê em li ser biaxivin, li dora maseyê rûnên’ wê demê divê em giraniyê bidin ser vê mijarê. Dema ku li ser vê hate axaftin, ji komîsyonê necameke erênî hat bidestxistin, em ê bigihêjin nuqteyeke gelekî baş.”
