Rêber Apo, bi banga xwe ya ‘’Aşitî û Civaka Demokratîk’’ têkildarî pirsgirêka Kurd a li Tirkiyeyê perpektîfeke nû pêşkêş kir û têkildarî pêvajoya çareseriyê pêngaveke nû avêt. Vê bangê, li hemberî nêzîkatiya dewletê ya ku bi salan e pirsgirêka Kurd weke mijareke terorê dibîne, helwesteke bihêz nîşan da û da diyarkirin ku mijar xwedî karektereke kûrtir û berfirehtir e. Rêber Apo, di vê banga xwe de da zanîn ku pirsgirêka Kurd ne bes mijareke ewlehiyê ye, di heman demê de pirsgirêkeke dîrokî, çandî û civakî ye jî. Girêdayî vê yekê destnîşan kir ku divê bi rêyên demokratîk û polîtîk were çareserkirin.
Banga Rêber Apo ne bi tenê li Tirkiye û Kurdistanê, di qada navneteweyî de jî deng veda. Wezîrê Piştevaniya Civakî yê Îtalyayê yê berê Paolo Ferrero li ser banga Rêber Apo ya dîrokî û geşedanên têkildarî wê ji ANF’ê re axivî.
Paolo Ferrero di destpêka axaftina xwe de diyar kir ku banga Rêber Apo gelekî erênî ye û got: ‘’Bi min banga Ocalan erênî ye, çimkî pirsgirêkeke gelekî giran tîne rojevê. Li bersiva çareseriya pirsgirêka Kurd digere. Ev pêvajo, pêvajoyeke siyasî ye û rewşa Tirkiyeyê ya heyî û têkiliyên li gel welatên derdor, dibe ku rê li ber pêşketina vê pêvajoyê vekin. Ji ber wê yekê ez banga Ocalan erênî dibînim. Her wiha yek ji aliyê banga Ocalan ê erênî ew e ku pêşiya diyalogê vebûye. PKK’ê jî girêdayî vê yekê diyar kir ku ew ji bo diyalogê amade ne. A niha mijara girîng destpêkirin û pêşxistina vê pêvajoyê ye. Lê belê tevî ku Ocalan hê jî di girtîgehê de ye, vê pêvajoyê bi rê ve dibe.’’
Ferrero di dewama axaftina xwe de diyar kir ku divê dewleta Tirk pêngavên hewce biavêje û ev yek anîn ziman: ‘’Girtina Ocalan, sekna dewletê ya li hemberî pêvajoyê nîşan dide. Ger Tirkiye bixwaze vê pirsgirêkê bi rêyên siyasî çareser bike, divê pêngavên hewce biavêje. Ji bo serketina banga Ocalan divê şert û mercên guncav û xebitînê werin dabînkirin. Bi taybetî jî divê ewlehiya gelê Kurd ê li Tirkiyeyê were dabînkirin. Ez di wê baweriyê de me ku kadroyên PKK’ê yên pêşeng xwedî wê kapasîteyê ne ku vê mijarê bi awayekî baldar binirxînin. Divê em li Ewropayê, piştevaniya banga Ocalan bikin, weke pêngaveke erênî bibînin û hewl bidin ku dewleta Tirk sekneke zextkar nîşan nede. Divê em sekna dewleta Tirk a li hemberî pêvajoyê eşkere bikin û zextê li hikûmetên Ewropayê bikin ku tevkariyeke erênî li pêvajoyê bikin. Serkeftina banga Ocalan bi pêşxistina xebatên siyasî pêkan e.’’
Paolo Ferrero diyar kir ku yek ji pêngavên têkildarî pêşketina pêvajoyê ew e ku divê PKK ji lîsteya terorê bê derxistin û têkildarî sekna welatên derve ya li hemberî pêvajoyê ev yek anîn ziman: ‘’A rastî Yekîtiya Ewropayê (YE) ne çareseri ye, parçeyeke pirsgirêkê ye. Em dikarin vê yekê di sekna wê ya li hemberî mijara Sûriyeyê jî bibînin. YE gelek caran pozîsyona xwe diguherîne. Weke hêzên çepgir ên li Ewropayê divê em vê pêvajoyê baş binirxînin û piştgiriyê bidin banga Ocalan. Di vê çarçoveyê de ji bo ku PKK ji lîsteya terorê were derxistin, divê em li ber xwe bidin. Divê em vê têkoşînê li her derê bimeşînin. Sekna Neteweyên Yekbûyî (NY) ji ya YE’yê erênîtir e. Ji ber vê yekê dikare li vir hin pêngav werin avêtin û divê têkildarî vê yekê jî bixebitin. Çimkî Sekreterê Giştî yê NY’ê Guterres di wê hêzê de ye ku dikare zextê li Tirkiyeyê bike. Bi min pêngava yekem ew e ku ji bo PKK ji lîsteya terorê were derxistin, divê kampanya werin destpêkirin. Bi vî awayî dibe ku pêvajoya aşitî û diyalogê destpê bike. Her wiha divê teqez pêngavên têkildarî azadiya fîzîkî ya Ocalan jî werin domandin û zêdetirkirin. Çimkî şert û mercên Ocalan niha di nav de, nayên qebûlkirin û derqanûnî ne. Jixwe heya ku Ocalan azad nebe jî ihtimala destpêkirina hevdîtinên aşitiyê jî gelekî kêm e. Ger Ocalan azad bibe û bi xwe pêvajoyê bi rê ve bibe, dê ev pêvajo bi hêsanî pêş bikeve.’’
Ferrero di dawiya axaftina xwe de bal kişand ser pêvajoya çekdanînêû got: ‘’Pêvajoya çekdanînê gelekî tevlihev û ne hêsan e ku em vê yekê di mînakên cîhanê de dibînin. Heya ku serokê siyasî û dîrokî yê tevgerê xwedî derfeta gotinê nebe, ev pêvajo pêş nakeve. Ev gelekî zelal e. Bi min dê pêvajo gelekî wext bigire. Ji ber wê yekê divê ji niha ve dest bi xebatan bê kirin û pêngavên hewce werin avêtin. Ocalan ji dewletekê re pêşniyazek kir û pêngavên têkildarî pêşketina vê pêşniyazê werin dîtin. Li gorî Ocalan pêvajoya azadbûna gelan, girêdayî kapasiteya veguherîna hêza li beramber e. Her wiha dixwazim dubare balê bikşînin ser girîngiya azadiya Ocalan. Ji ber ku bi rastî jî azadiya Ocalan li hemberî çareseriya pirsgirêkên li tevahiya herêmê weke fersendeke dîrokî ye.’’
